A Fonsagrada chora a Manuel Lombardía, «un rapaz auténtico e moi querido»
A Fonsagrada
Faleceu este venres aos 46 anos e este domingo pola tarde haberá en Lugo unha homenaxe da súa familia e os seus amigos, con música tradicional dos seus compañeiros de Son de Lugh
22 ene 2024 . Actualizado ás 21:28 h.A Fonsagrada chora o falecemento, aos 46 anos de idade, de Manuel Lombardía Pereira, unha persoa moi querida e moi coñecida na comarca fonsagradina, ao formar parte dunha das familias de referencia do municipio, xa que o seu pai Víctor é o histórico xefe de Protección Civil. Unha enfermidade levou por diante a vida este enxeñeiro de profesión e gran amante da cultura tradicional galega, como demostraba cada ano cando participaba coa súa gaita na Foliada da Fonsagrada.
Manuel Lombardía, Manel coñecido para os amigos, falecía na noite do venres en Lugo cidade e xa foi incinerado na mañá deste domingo na intimidade familiar. Pero esta tarde de domingo, en Velorios Lucenses, na capital lucense, onde traballaba como enxeñeiro, celebrouse, a partir das catro, unha sentida homenaxe da súa familia e dos seus amigos, onde se interpretaron pezas de música tradicional. Logo, a comitiva acudiu ao lugar de Barcias, en Baleira, onde se esparcieron as cinzas de Manel.
Manuel Lombardía Pereira deixa muller, Livia Barreiro, e tiña unha irmá, Tamara, ademais de que os seus pais Víctor e Ermidas son persoas de gran cariño e respecto na Fonsagrada. O seu pai despedíase do seu fillo nas redes sociais cun emotivo recoñecemento.
Os seus compañeiros do grupo Son de Lugh tiveron un recordo para Manel en redes sociais: «En Son de Lugh estamos destrozados. Morreu o noso gran gaiteiro e mellor amigo, Manel. Descansa xa Manel. Ímoste botar de menos».
Os que coñeceron e trataron a Manuel Lombardía destacan del que era «unha persoa, que ademais de moi lista e preparada profesionalmente, era un rapaz auténtico, moi querido por todos». Por exemplo, os seus compañeiros de estudos en Asturias viñan nos últimos meses ata Lugo para comer con el, acompañarlle e animarlle. Tamén o seu amigos de Lugo estaban pendente del.
Por casualidades da vida, Manuel Lombardía faleceu uns días antes de que cumprise os 47 anos, e ademais, o seu velorio coincidiu co 20 de xaneiro, data que se elixiu para render unha homenaxe ao seu pai Víctor Lombardía, tantos anos velando pola seguridade dos veciños, visitantes e peregrinos da comarca.