Casa Quiñones impulsa a artesanía cun taller gratuíto de feltro nos Ancares

Casa Quiñones, en Navia de Suarna, é un establecemento de agroturismo e cultura situado na Reserva da Biosfera Ancares Lucenses e Montes de Cervantes. Tras participar este verán no «V Recital de poesía e música SOS Castelo de Navia», a casa organiza un taller gratuíto de feltro a primeira fin de semana de setembro, días 6 e 7, limitado a 10 prazas e financiado pola Deputación de Lugo. 

Para participar é necesario inscribirse na Reserva da Biosfera no teléfono 982 227 813 ou no correo electrónico ancareslucenses@deputacionlugo.org. Nel, os participantes aprenderán a traballar a la de ovella para crear pezas artesanais utilizando técnicas tradicionais de lavado, cardado e modelado a man, tal e como explica o seu organizador Pedro Álvarez.

—Cal é a filosofía de Casa Quiñones?

—Máis que un establecemento hostaleiro, Casa Quiñones é un modo de vida no rural, onde se intenta achegar o campo aos hóspedes que nos visitan dunha contorna urbana. Aquí poden ver a horta, as galiñas, as ovellas, sentir o monte, a montaña, o contacto coa natureza, ata o silencio.

—Este verán participaron nun recital de poesía e música. Que importancia teñen este tipo de eventos culturais para Casa Quiñones?

—O rural necesita lecer. Quen vivo nel tamén necesitamos construír e participar da arte, a cultura, a música, a poesía. A un proxecto como Casa Quiñones faltaríalle unha pata se non contemplase a literatura e o mundo de emocións que representa. Quero agradecer á Asociación Veciñal Irmandade Naviega por contar connosco para o desenvolvemento de moitas das súas actividades. Ademais do recital de poesía, tivemos exposicións de acuarela, presentación de libros etc.

—Que relación teñen coa Reserva da Biosfera Ancares Lucenses e Montes de Cervantes?

—Casa Quiñones forma parte do territorio; un territorio que ademais non se entendería sen a presenza e intervención humana que o caracterizou e deulle forma durante xeracións. Como tal, involucrámonos e participamos no desenvolvemento das actividades socioculturais e de dinamización que se organizan na Reserva.

—Que motivoulles a organizar un taller de técnicas de elaboración artesanal de feltro?

—A la de ovella foi perdendo o seu uso nas últimas décadas e converteuse nun produto de desfeito sen apenas valor. Ao mesmo tempo, están a xurdir iniciativas para a súa utilización artesanal, cun alto valor engadido, entre as que destaca a produción de feltro. Queremos axudar a dalo a coñecer, pois a súa elaboración é moito máis sinxela que fiar e tecer, e observamos que quen o aprende continúan usándoo no futuro.

—Para quen non coñecen o feltro, en que consiste esta técnica e que tipos de pezas pódense crear?

—O feltro son as fibras da la sen tecer. Para iso lávase e se carda a la e, posteriormente, dáselle forma segundo a peza que se desexe fabricar. Pódese tinguir ou utilizar na súa cor natural. Neste taller ensinaremos a traballar o feltro exclusivamente coas mans, utilizando auga e xabón, e elaboraremos pezas como mosaicos, zapatillas, bolsos, fundas de móbiles etc.

—Que valor achega aprender estes procesos tradicionais?

—Intentamos mostrar todos os pasos para que os participantes poidan ser autosuficientes e realizar na súa casa as pezas e pezas que desexen. Aínda que o taller non vai enfocado á limpeza, cardado ou tinguido da la, tamén o veremos e practicaremos cunha máquina de cardado.

—Como cre que iniciativas como esta poden contribuír á valorización da la?

—O traballo do feltro é moi creativo e bonito. Temos exemplos de persoas que tras un taller continuaron nas súas casas, e incluso se animaron a ter 2 ou 3 ovellas propias. A maior escala, existen iniciativas para a utilización da la en illamentos de bioconstrucción. Outro uso interesante é o almofadado da horta para evitar malas herbas e manter a humidade do chan.

—Que importancia ten manter viva a artesanía tradicional na comarca e fomentar a creatividade local?

—O territorio tamén o constitúen as persoas que vivimos nel. Tanto a artesanía como os saberes tradicionais forman parte desa riqueza humana viva. Contamos con veciños cunha valía e creatividade excepcional que debemos axudar a manter e fomentar. Forma parte da nosa identidade.

—Colaboran coa Asociación de Criadores de Ovella Texel. Que achega esta cooperación ao taller e ao proxecto en xeral?

—É clave para a sustentabilidade do territorio e a prevención de incendios forestais mediante pastoreo. A ovella galega é dura e resistente, adaptada ao clima e orografía local, mentres que a Texel permite obter cordeiros de maior peso, o que axuda á rendibilidade das explotacións. A falta de rendibilidade frea novas incorporacións, o que agrava o problema dos incendios. Queremos agradecer o apoio da Asociación de Criadores de Ovella Texel en todas as fases do proxecto.

—Despois deste taller, teñen pensadas outras actividades similares para continuar promovendo a artesanía e a cultura?

—Si, seguiremos desenvolvendo e participando en talleres e actividades que contribúan á dinamización sociocultural e económica do territorio.

---

---