A autovía está aberta ao tráfico, pero a visibilidade é moi reducida e a alternativa é a N-634
04 jul 2025 . Actualizado á 11:02 h.A néboa domina o tramo da autovía do Cantábrico (A-8) que pasa por Ou Fiouco (A Pastoriza) na primeira fin de semana de xullo. Os 16 quilómetros que van de Arroxo (Lourenzá) á Xesta (Abadín) están abertos á circulación, pero a visibilidade é moi reducida. A situación arrástrase desde principios desta semana, na que a zona empezou a quedar baixo os efectos da bruma. A DXT activou varias veces, na súa páxina web, un aviso por escasa visibilidade nese tramo.
O problema deste venres ten máis repercusión por ser a primeira fin de semana dun mes vacacional e por tratarse dunha vía de comunicación pola que se accede a municipios como Foz e Barreiros, onde a poboación crece notablemente no verán.
Se os automobilistas desexan evitar o paso polo alto de Ou Fiouco, que cos seus 698 metros é o de maior lonxitude de todo o trazado da A-8, a alternativa é circular pola N-634.
Con todo, así non se libran da néboa e deben soportar outros coñecidos contratempos: abundan as curvas, está prohibido adiantar entre A Xesta e Mondoñedo e carécese dun carril de vehículos lentos no último tramo de subida á Xesta.