Un grupo de profesores xubilados autoedita o seu propio libro: «A nosa idea é seguir xogando co galego, coa narrativa e a prosa»
LUGO
Seis profesores xubilados reúnense en Lugo para para presentar o seu último proxecto tras case unha década de encontros semanais
27 jun 2025 . Actualizado a las 12:15 h.Un grupo de seis profesores xubilados do colexio Riomaior, situado xunto á Ponte de Rande na Ría de Vigo, leva oito anos reuníndose cada semana para escribir. A súa historia comezou tras a xubilación, hai xa unha década, cando decidiron reencontrarse para tomar un café. Daquel encontro casual naceu unha tradición que hoxe se consolidou como un proxecto literario colectivo.
O grupo —composto por Carmen Jar, Eva Rodríguez, José Manuel Pérez, José Manuel López, Miguel Anxo Mouriño e José Luís Vázquez—, formaba parte do claustro desde 1985 e compartiu case tres décadas de docencia no mesmo centro. A conexión entre eles segue intacta, coma se nunca deixasen as aulas. Ao grupo orixinal de sete profesores sumáronse as súas respectivas parellas, todas elas tamén implicadas no proceso creativo.
Un reto creativo
Cada semana, un deles propón unha frase ou reto en galego composto por tres ou catro palabras, e todos deben escribir un texto breve, dun máximo de 150 palabras e que conteña esa frase. Aínda que ao principio lían os seus textos nos encontros presenciais, a pandemia levounos a organizarse dixitalmente: o reto proponse os martes e os textos deben enviarse antes do luns seguinte, nun calendario que respectan «coma se seguisen o horario escolar».
En total, elaboran unha media de 24 retos ao ano, que logo recompilan nun libro que editan e maquetan de forma profesional, con exemplares que custan aproximadamente 64 euros cada un. Estes volumes, únicos e persoais, destínanse a cada membro do grupo e a algúns familiares. O primeiro libro foi escrito a man; hoxe en día, as súas publicacións contan mesmo con ilustracións personalizadas.
O ano pasado realizaron unha edición especial con contos infantís, dedicados á mascota do colexio Riomaior, Buli (diminutivo de Bulibreiro), un símbolo que conservan como parte esencial da súa identidade docente.
Último encontro
A última reunión de peche de curso celebrouse este ano en Lugo, onde presentaron o seu novo libro impreso e compartiron as súas impresións sobre unha actividade que consideran moito máis que un pasatempo. Os temas que abordan son variados, desde cuestións políticas actuais ata xogos de palabras e dobres sentidos, sempre co obxectivo de «xogar coa nosa lingua», como afirman con orgullo.