Xulgado por abusar da filla dunha amiga, de 9 anos e con discapacidade intelectual
LUGO
O home negou os feitos e asegurou que xamais tocou á nena. Piden catro anos de prisión para el
21 ene 2025 . Actualizado á 19:40 h.Catro anos de prisión. Esa é a pena que solicitan a Fiscalía e a acusación particular para un lucense, acusado de abusar sexualmente da filla dunha amiga. Eses catro anos son case a metade da idade que tiña a pequena cando se denunciaron os feitos.
O xuízo celebrouse este martes na Audiencia Provincial de Lugo. Ademais da pena de prisión, pídense varias mediadas complementarias. O seu defensa, con todo, pide que sexa absolto ao apreciar unha falta de probas.
A vista centrouse nas declaracións da nena, que tiña nove anos no momento do suceso, da súa nai, dunha amiga e do acusado. Tamén compareceu unha psicóloga forense que tratou á pequena un ano despois do suceso.
Nin a nena nin a súa nai declararon no xuízo
O procedemento atrasouse un tempo, xa que a pequena non se atreveu a denunciar os feitos cando ocorreron, senón que tardou uns meses. Tras seis anos, a causa chegou a xuízo este martes. A grandes liñas, a Fiscalía e a representación legal da familia da nena aseguran que o acusado, amigo da súa nai, someteuna a uns tocamentos cando estaban a celebrar un aniversario na casa do procesado. Segundo a súa versión, meteuse nun cuarto con ela cando estaba a xogar cun can, abusou dela, e incluso lle preguntou «se quería ser a súa noiva».
A sesión comezou coa reprodución da declaración da pequena en fase de instrución. Optouse por non facela acudir á Audiencia para evitar que revivise un episodio potencialmente traumático para ela. Por iso, reproduciuse o audio da súa declaración no xulgado hai uns anos. Nela, expúxose a súa versión dos feitos, relatando cal era a súa relación co acusado e como se produciron eses abusos.
Despois, a presidenta do tribunal leu de viva voz a declaración da nai ante a Policía Nacional. Desta forma, ela tampouco acudiu ao xuízo. Nese documento, especifícase que a nai se decatou do sucedido tempo despois, cando ela e a súa filla atopáronse ao acusado nun parque da localidade na que vivían. A nena chegou chorando e ela, estrañada, preguntoulle o motivo. Máis tarde, na súa casa, contoulle a historia, «xesticulando» como fora, di o escrito.
Unha amiga da nai, que estaba presente do día do suposto abuso, compareceu tamén como testemuña. Ela afirmou que se decatou do ocorrido tempo despois. «Contáronmo a nai e a filla. A nena explicábao claramente, como a tocara e que non lle gustara nada», declarou.
Foi a psicóloga forense que tratou á pequena tras a denuncia a que destacou un detalle que ata entón non fora mencionado. «Aprezamos deficiencias cognitivas importantes. A nena tiña dificultades para expresarse e para outras capacidades. Concluímos que tiña unha discapacidade evidente». Ademais, perítoa asegurou que o testemuño da pequena era o de «unha persoa que parecía que efectivamente vivira os episodios que relataba», dando así veracidade á súa declaración.
O acusado negou tocar á nena
O último en intervir foi o propio acusado. Nunha breve declaración, negou todos os feitos. «Non falei con ela ese día nin entrei no seu cuarto. Nós estabamos no salón celebrando o aniversario e ela ía e viña. Recordo que estaba a xogar cun can. En ningún momento quedei só con ela e moito menos fíxenlle esas cousas», relatou.
Finalmente, dixo descoñecer o motivo polo que a nena o denunciara e lembrou que pasara un tempo desde aquel día e o inicio do proceso xudicial. Nese lapso, volveu ver á nena e á súa nai nalgunha ocasión, na rúa, e «todo era normal», segundo a súa versión.
A Fiscalía e a acusación particular piden catro anos de prisión por un delito de abuso sexual sobre menor de 16 anos. O Ministerio Fiscal solicita tamén a prohibición de aproximación á vítima, ao seu domicilio, lugar de traballo ou calquera en que se atope, a unha distancia inferior a 500 metros, así como prohibición de comunicarse con ela por calquera medio ou procedemento, por tempo de 8 anos. O fiscal pide a imposición da medida de liberdade vixiada durante 5 anos e a súa inhabilitación para exercer profesión ou oficio que implique contacto regular e directo con menores de idade durante 8 anos. Polos danos morais, o fiscal reclama unha indemnización de 6.000 euros, a cal a acusación particular eleva a 20.000.