O BNG realiza unha caravana reivindicativa para pedir o arranxo das estradas da provincia de Lugo
LUGO
Cargos do partido realizaron unha viaxe en sinal de protesta desde Lugo ata Becerreá pola A-6. O PP pide priorizar o arranxo das vías municipais
04 may 2024 . Actualizado ás 18:22 h.O BNG realizou este sábado unha peculiar caravana reivindicativa desde a cidade Lugo ata a localidade de Becerreá para demandar a mellora das infraestruturas viarias de titularidade estatal da provincia lucense ante a «falta de compromiso e de inversión» por parte do Goberno central.
En concreto, piden ao Ministerio de Transportes que leve a cabo as actuacións necesarias para mellorar o firme e mellorar a seguridade viaria na autovía A-6 e as estradas N-6, N-540, N-640 e N-120.
Este acto enmárcase na campaña dos nacionalistas «Arranxo XA das nosas estradas» para reclamar o arranxo destas infraestruturas a través de iniciativas institucionais compasadas co apoio social.
«A A-6 e as N-VI, N-540, N-640 e N-120 son infraestruturas esenciais e estratéxicas para garantir o desenvolvemento social e económico das comarcas lucenses. Porén, o estado actual deixa moito que desexar e mesmo diminúe a seguranza viaria en estradas polas que circulan diariamente centos de vehículos», denunciou o deputado do Bloque no Congreso, Néstor Rego.
Pola súa banda, o tenente de alcaldesa de Lugo, Rubén Arroxo, lembrou que as comarcas lucenses sofren «un illamento con serios problemas de comunicación, tanto a nivel ferroviario como por estrada».
O PP pide priorizar o arranxo das estradas municipais
Esta caravana tivo a súa resposta desde o Grupo Municipal do Partido Popular de Lugo, que manifestou este sábado que «é unha burla aos lucenses que os nacionalistas se unan a unha protesta para reparar as estradas nacionais, que abandonou o goberno de Sánchez que eles sustentan, mentres que miran para outro lado á hora de manter a rede viaria municipal».
Os populares aseguran que varias estradas da cidade amurallada presentan un estado definiciente, polo que afirman que «a prioridade [de Arroxo] debería ser o arranxo inmediato dos desperfectos do firme en rúas e pistas do municipio».
O tenente de alcalde, a través das súas redes sociais, puntualizou que o seu grupo explicou na comisión do pasado 25 de abril que «se están a reparar todos os danos deste inverno cada día que non chove», xa que os días de choiva «o aglomerado non se pode botar».