Aínda se poden comprar entradas por días para asistir aos concertos
25 abr 2024 . Actualizado á 20:07 h.Vilalba inaugura a tempada de festivais de música en Galicia. O Festival Independente de Vilalba (FIV), que chega ás dezasete edicións, celébrase esta fin de semana, cunha nova mostra do seu tirón: este mércores, dous días antes do inicio, xa non quedan abonos, segundo anunciou a organización. Quen desexe asistir aos concertos teñen unha posibilidade, posto que aínda quedan entradas por días na web.
O FIV 2024 supón, entre outros, aspectos, unha volta ao espírito orixinal, cos concertos de novo na praza da Constitución tras trasladalos ao campo da feira. O venres, primeiro día, actuarán Dorian, Vinte e un, Grande Amore, Mondra e Eme Dj. Iván Ferreiro, A Randeeira Asasina, Nena Polaca, Lontreira, Serial Killer e Señora Dj forman o cartel do sábado. A apertura das portas para acceder está prevista os dous días para as sete e media da tarde.
No programa introduciuse un cambio ante a previsión de mal tempo. O Auditorio Municipal acollerá o sábado as actuacións do Escenario Emprazadas, que estaba previsto instalar na praza de Santa María. O primeiro concerto (12.30 horas) será o da Banda de Música de Vilalba, ao que seguirá o De Ninghures. A seguinte actuación será a de Dj Grande Osso, e a sesión pecharase co Karaoke FIV Stars.
Debido á previsión de mal tempo, tamén se cambiou a zona de acampada, que pasa do estadio Roca ao campo da feira.