Complicado rescate dunha persoa atrapada baixo unha árbore nun monte con 200 metros de desnivel en Cervantes
LUGO
Os equipos de emerxencias, acompañados por un veciño, descenderon a pé dous quilómetros ata a zona do río para liberar ao ferido e trasladalo en padiola
10 oct 2023 . Actualizado á 10:09 h.Complicado rescate o que se viviu este luns en Cervantes. Ata alí trasladáronse a Garda Civil, os Bombeiros e persoal sanitario para socorrer a unha persoa que se quedou atrapada baixo unha árbore en Cervantes.
A Garda Civil foi alertada sobre as sete da tarde do luns de que unha persoa quedara atrapada debaixo dunha árbore no lugar de Noudelo, na parroquia de Donís. Inmediatamente, trasladáronse ata a zona, pero tiveron que deixar os vehículos na estrada e baixar andando ata o lugar do accidente, no medio do monte, cun desnivel de 200 metros. Os axentes realizaron o descenso acompañados por un veciño do lugar.
Tras uns dous quilómetros de baixada ata a zona do río, atoparon á persoa ferida, que foi atendida polos equipos sanitarios e de bombeiros. Unha vez liberada, tiveron que facer o traslado monte arriba de novo a pé, con padiola en man, entre Guardia Civil, Bombeiros e varios veciños.
Finalmente, o ferido foi evacuado ao HULA en ambulancia, e o seu estado era grave.