O adestrador do Eibar, Gaizka Garitano, recoñece a dificultade que entraña enfrontarse ao Lugo, e faio con argumentos. Céntrase na traxectoria dos albivermellos na liga e no feito de que sexa o segundo equipo que menos partidos perdeu.
«Están a facer as cousas magnificamente. Cando estás en marzo e es o segundo equipo que menos partidos perdeu non hai que dar máis datos. Con que deas ese dato sabemos a dificultade que ten o partido e tratarémolo de encarar do mellor xeito», indicou.
O preparador do Eibar espera un partido de alternativas, algo que sempre sucede cando un dos protagonistas dun partido é calquera dos dous equipos. «Todos os partidos son difíciles e este tamén o vai a ser, para eles tamén. Seguramente haberá alternativas, momentos para os dous equipos e trataremos de impoñernos. Están a facer un temporadón e van querer seguir gañando partidos e sendo o competitivos que están a ser», engadiu.
As claves
Á hora de analizar as claves do encontro, Garitano é claro. «Coñecemos ao rival moi ben, o que fai ben e o que pode non facer tan ben. Eles tamén nos coñecen a nós. Dámoslle importancia a facer nós ben as cousas, priorizamos o que imos facer nós, pero temos que saber que eles son un grande equipo. É dos mellores equipos nas dúas áreas, que é onde importa o fútbol. É un equipo de autor, que fai as cousas moi ben», concluíu.
O adestrador fixo un chamamento á afección para encher Ipurua nun momento histórico para o club, que aspira a conseguir o seu segundo ascenso a Primeira nos seus 82 anos de existencia.