Na área sanitaria da provincia traballan nestes momentos 139 residentes, e pronto chegarán 61 máis
24 feb 2020 . Actualizado ás 13:31 h.Os residentes que completan a súa formación no HULA saían esta semana dunha das reunións mensuais de formación, que se encadran dentro das chamadas mañás docentes. Agora mesmo, son 139 os residentes que se forman na área sanitaria da provincia. Este ano, incorporaranse 61 máis, «os de primeiro ano, pero ao ser especialidades de polo menos catro, hai que multiplicar a cifra por catro», conta a directora de docencia e calidade, Pilar Ledo, que tamén explica que o número de residentes creceu nos últimos anos. O HULA acollerá pronto unha xornada de portas abertas por terceiro ano consecutivo para «dar a coñecer aos futuros residentes as cousas que se fan no HULA e como. Así, resolven dúbidas con respecto á especialidade e ao lugar», engade Ledo.
O xefe de estudos da comisión de docencia da EOXI e especialista en Ginecología, Antón Castro López, explica que nos últimos anos quedaron no HULA aproximadamente o 50% dos residentes que formaron, aínda que as cifras varían en función das necesidades do hospital. «Nos últimos anos, os que se quixeron quedar, puideron facelo», engade Pilar Ledo.
Os alicerces da formación
Antón Castro explica que a formación dos residentes do HULA componse de varios alicerces: Especialidades Intrahospitalarias, Medicina Familiar e Comunitaria e especialidades de Enfermería. Ao ser un modelo nacional, os residentes elixen o lugar no que formarse, pero tamén a especialidade.
Os MIR teñen un titor, que realiza un seguimento durante toda a residencia, pero o labor de Antón Castro e Pilar Ledo é fundamental á hora de facer un cómputo global. Ademais, no HULA, a formación dos residentes é continua. Hai sesións clínicas de todas as especialidades dúas veces ao mes, ás que acoden todos os alumnos. Pero non se celebran só no hospital lucense, esténdense a Atención Primaria, Burela e Monforte.
Tamén hai 11 grupos de investigación creados hai pouco, que puxeron en marcha distintos proxectos. A formación dos médicos ten tres patas: formación de grao, sanitaria especializada (residencia), continuada e de posgrao, que é o doutoramento no que se encadra a liña de investigación.
Pero no HULA, ademais dos MIR, fórmanse alumnos de todas as ramas: Enfermería, Farmacia, Bioloxía, Historia e mesmo de ciclos superiores. Ademais, alumnos estranxeiros elixen o hospital lucense para completar a súa formación.
As especialidades máis demandadas: Pediatría e Medicina de Familia
As especialidades máis demandadas, explican Antón Castor e Pilar Ledo, son Pediatría e Medicina de Familia. Na outra parte están campos como a cirurxía, «unha especialidade con moitos especialistas» e outras moi específicas «como a cirurxía vascular». Á hora de contratar, Ledo conta que inflúen varios factores: as necesidades do sistema dos especialistas en formación e a expansión e o desenvolvemento dos propios servizos. «Pode ser que unha especialidade non teña déficit de especialistas en número xerais, pero que aquí, porque hai novos programas e enfoques, estea en pleno desenvolvemento», conta Ledo, que pon de exemplo que «cando se incorporou Hemodinámica houbo un crecemento en Cardioloxía».
Pero na oferta e a demanda inflúe tamén a necesidade de reposición e é que, en apenas cinco anos, haberá que repor o 50% dos médicos de Familia. «En Cardioloxía, creouse unha nova carteira de servizos e para desenvolvela necesítanse profesionais. Se crecemos é porque os necesitamos e, se poden ser formados por nós, pois mellor», explica Ledo, que agarda que a maior parte dos residentes que hai actualmente no HULA queden ao rematar a especialidade. Anton Castro tamén explica que a Consellería fai un estudo anual para determinar necesidades.
«O HULA é unha boa opción para a residencia, a formación é moi dirixida»
Cristina Rodríguez Díaz é médica. Fixo o MIR e agora, con 28 anos, está a piques de rematar a residencia. O seu é a Medicina Familiar e Comunitaria.
—Que opcións barallará cando remate?
—Atención Primaria, HADO (hospitalización a domicilio) Urxencias, 061... coa Medicina de Familia temos moitas opcións.
—Sempre quixo especializarse nisto?
—Si, desde primeiro de carreira tiña claro que o meu era a Atención Primaria, aínda que evidentemente barallei outras opcións ao longo da carreira. Mesmo durante a residencia expónseche materias novas.
—Medicina é unha carreira longa.
—É unha carreira de fondo. Nunca se acaba porque sempre tes que estar a estudar e actualizándoche. É algo inherente a esta profesión.
—Por que decidiu facer a residencia no HULA?
—Son de Sarria . Fixen o MIR fose e foi un período moi duro, de moito estudo, no que tamén botei de menos estar en casa. Tiven a oportunidade de escoller a praza aquí e non o dubidei. O HULA é unha moi boa opción.
—Vantaxes de facer a residencia en Lugo?
—Isto é máis familiar, coñecémonos todos. A formación é máis dirixida, síntome en casa.
—Cando remata?
—Remato en maio, entón todos teremos que barallar opcións laborais. Cando elixamos o campo no que queremos traballar, temos que opositar.
—Opositar outra vez.
—O MIR non se considera unha oposición como tal, se non un requisito previo para poder facer a especialidade médica. Optas a unha ou outra en función desa nota porque cho xogas todo nun día. E despois, a opositar de novo.
—O camiño é longo, pero a aprendizaxe é continuo.
—Aprendes moito durante o camiño, nestes catro anos de especialidade. Aprendes moitas cousas que non son teóricas e que che permiten comunicarche mellor co paciente.
—Onde traballa agora mesmo?
—Agora mesmo estou no Centro de Saúde de Fingoi. Tamén facemos gardas en Urxencias e PAC, así como algunha quenda na ambulancia medicalizada do 061 e en Pediatría.