Libera! e a fundación Franz Weber animan aos populares a pedir estudos científicos sobre poboacións e o impacto do chumbo
27 ene 2019 . Actualizado ás 12:34 h.A asociación animalista Libera! e a fundación Franz Weber cargan contra o Partido Popular. Tras a aprobación dunha proposición non de lei para instar a Xunta de Galicia a non apoiar nin subvencionar os campionatos de caza de raposos o pasado 1 de marzo do ano pasado (co respaldo da formación azul), tachan de «broma» a moción que os populares pretenden levar ao pleno da Deputación este martes en defensa da caza.
Denuncian que o texto está «trufado de estatísticas e datos que nin sequera se refiren á comunidade autónoma e que mestura cuestións cinexéticas co sector forestal». Os animalistas instaron ao PP a solicitar da Xunta estudos científicos que avalen a convocatoria de «campionatos» para cazar raposos con cans, como os máis de 75.000 mamíferos abatidos entre 2011 e 2017, dos que máis de 38.347 foron na provincia lucense.
Piden tamén que demanden do executivo autonómico un informe independente sobre o impacto ambiental e animal da munición de chumbo que se emprega en centos de batidas e que segundo a Axencia Europea de Sustancias e Mesturas Química supón un risco para os ecosistemas terrestres. Munición que só está prohibida nos humidais.
