![](https://img.lavdg.com/sc/fF82E0fvq8u0FatGTSbhRB7iEzY=/480x/2018/11/13/00121542143702517623406/Foto/LN14C1F6_22140.jpg)
Permitirán reducir as 300 mortes súbitas anuais por parada cardíaca na provincia
16 nov 2018 . Actualizado á 18:01 h.A compra de 73 desfibriladores, que se incorporarán para o ano próximo en dependencias municipais, permitirán reducir o número de mortes súbitas por parada cardíaca. Na provincia de Lugo calcúlase que 300 persoas perden a vida cada ano nestas circunstancias. A adquisición destes aparellos -custarán entre 2.000 e 2.500 euros cada un- irá acompañada da formación de voluntarios para que saiban usalos en caso de necesidade, en tanto non chegan os servizos de emerxencias. Coa súa incorporación, a cidade de Lugo pasará a converterse na primeira cidade do noroeste peninsular cardioprotegida, ao dispor de máis de 10 desfibriladores por cada 10.000 habitante, unha variable moi similar a Italia ou Francia, segundo apuntou onte o xefe de servizo de Cardioloxía do HULA, Juan Carlos González Juanatey. A media en España é actualmente de 3 por cada 10.000 habitantes.
O programa «Lugo non corazón» foi presentado onte na cidade pola alcaldesa, Lara Méndez, quen aproveitou para instar á Xunta a que instale nas súas dependencias desfibriladores automáticos e a que asuma, como propio, o decreto doutras comunidades autónomas, que en Galicia funciona a modo de recomendación. Compareceu acompañada do presidente de Cruz Roja, Luis Abelleira, que se encargará de facilitar a formación dos voluntarios; do xefe de Cardioloxía do HULA, que lembrou que na cadea de supervivencia ante casos deste tipo, a probabilidade baixa se non se atende nos primeiros dez minutos e do presidente da Federación de Asociacións de Vecinos, Jesús Vázquez, quen anunciou que fomentará a formación entre as asociacións. A alcaldesa anunciou que a compra dos desfibriladores sairá a licitación. Explicou que estaban a traballar no prego de condicións, co asesoramento de González Juanatey. Segundo dixo, aínda non se sabe o prezo dos aparellos, que se moven no mercado entre os 2.000 e os 2.500 euros. O gasto final, segundo dixo, dependerá das ofertas que se presenten no seu momento.
Segundo a alcaldesa, tratarán de axilizar os trámites para poder repartir canto antes os desfibriladores. Recoñeceu que no mes e medio que queda para que finalice o ano vai ser unha meta difícil de conseguir. Recoñeceu, con todo, que estarían operativos a principios do próximo ano.
Os destinos
Os desfibriladores repartiranos en dependencias do Concello de Lugo e tamén disporá dun número deles móbiles para poder ceder aos colectivos que os necesiten nalgunha actividade. Entre eles citou a Federación de Asociacións de Vecinos, na súa festa anual, na que reúne a unhas 4.000 persoas.
Lara Méndez puntualizou que esta sería unha primeira fase, que se ampliará posteriormente para chegar a «outras esferas». Segundo dixo, pódese ir traballando na formación do voluntariado, en tanto non chegan os aparellos a Lugo.
González Juanatey lembrou o empeño da Sociedade Española de Cardioloxía pola redución dos casos de morte súbita por parada cardíaca.