O inicio dos traballos en Castro está á espera da autorización de Patrimonio
11 sep 2017 . Actualizado á 05:00 h.O inicio das obras da Unidade Dual, que porá en marcha Fudace en Castro Ribeiras de Lea, está pendente dun informe de Patrimonio que constate que os movementos de terra na zona na que edificarán non afectan a unha mámoa. Está situada a uns 500 metros do centro desta organización. A finais da semana pasada agardaban que técnicos de Cultura realizasen catas arqueolóxicas na zona para elaborar o informe correspondente, que permita o inicio dos traballos.
As obras foron adxudicadas a finais desta semana. Segundo o presidente de Fudace, Luis Abelleira, necesitan poder empezar canto antes a execución porque serán financiadas con cargo a unha subvención do Agader. O compromiso adquirido no seu momento foi o de ter o novo centro aberto a finais do próximo ano. Abelleira explicou que, dada a situación actual, antes do día 15 do mes que vén veranse obrigados a solicitar unha prórroga.
Financiado con fondos europeos
O investimento previsto na construción do edificio ascende a 1.347.700 euros e será financiada con cargo a fondos europeos. A unidade disporá de oito prazas, que serán ampliables no futuro como consecuencia do sistema modular adoptado, segundo explicou Abelleira. As prazas que se crean non son suficientes para atender toda a demanda, segundo recoñeceu o presidente desta fundación. Admitiu que supuñan pór en marcha un proxecto que poderá ampliarse en función da demanda, tal como ocorreu con Dano Cerebral. Este último centro, no que traballan 40 persoas, foi sometido a unha importante reforma -o investimento acadou os 600.000 euros- para ampliar o número de prazas de 30 a 40.
Fudace conta nestes momentos cun centro de dano cerebral que atende a 42 persoas, en réxime de internamento. A fundación dispón ademais doutras dez prazas no centro de día.
Para a unidade terá que crear persoal, en función dos cocientes que están establecidos.
O monumento funerario está situado a uns 500 metros da leira na que traballarán