Os científicos obteñen na cova de Arcoia unha secuencia de datos climáticos dos últimos 550.000 anos
15 dic 2014 . Actualizado á 09:38 h.O próximo marzo serán presentados nun congreso científico nos Estados Unidos -o encontro anual da Geological Society of America- os últimos resultados dunha longa investigación sobre os climas prehistóricos de Galicia na que se utilizaron as estalagmitas da cova de Arcoia, na serra do Courel. No estudo tomaron parte investigadores do Instituto Universitario de Xeoloxía da Coruña e das universidades norteamericanas de Xeorxia, Minnesota e Illinois.
En fases anteriores deste proxecto, os científicos xa conseguiran reconstruír datos climáticos de fai 14.000 e 235.000 anos. Hai uns meses anunciouse que se logrou extraer outros datos moito máis antigos, de fai máis de medio millón de anos. Unha vez rematado o complexo proceso de revisión das datacións, agora confírmase que foi posible reconstruír unha secuencia practicamente continuada de información climática que abarca os últimos 550.000 anos. O xeólogo Juan Ramón Vidal Romaní, director do instituto coruñés, sinala que esta é a secuencia máis longa, antiga e completa que se obtivo ata o de agora en terra firme en toda a Península Ibérica. «Nos depósitos sedimentarios mariños da plataforma continental xa se conseguiron outros rexistros máis antigos, pero os de Arcoia son moi importantes porque nos proporcionan unha información directa e moito máis exacta sobre o clima de terra firme nun arco de tempo moi extenso», explica.
Este grande arquivo de datos climáticos -engade Vidal Romaní- pode constituír unha importante axuda para moitos investigadores. As informacións extraídas das estalagmitas de Arcoia non só terán interese para os estudos sobre os paleoclimas do noroeste ibérico e a dinámica dos cambios climáticos. Tamén serán de gran valor para os arqueólogos, os paleontólogos e os botánicos especializados na flora antiga, xa que proporciona unha base fiable para reconstruír as condicións ambientais do pasado. «Estes datos, por exemplo, poden ser moi útiles para os arqueólogos que investigan actualmente os xacementos de Cova Eirós e doutros lugares, porque serven para entender mellor como eran os ecosistemas que rodeaban ás poboacións do Paleolítico e cales eran as súas condicións de vida», explica o xeólogo.
Fauna fósil
O rexistro climático será así mesmo un complemento de gran valor para as investigacións que outros especialistas do instituto xeolóxico coruñés están a levar a cabo desde hai varias décadas sobre a fauna fósil do Pleistoceno das montañas lucenses.