O videoxogo «Guitar Hero» é un título con gran éxito no mundo dos streams, a pesar de non ofrecer unha experiencia de xogador vs xogador
05 abr 2018 . Actualizado ás 15:06 h.Estamos acostumados ao compoñente competitivo nas plataformas de streaming, os xogos que conquistan estes portais adoitas ter un compoñente PvP (Player Vs Player) moi marcado, e a miúdo son xogos baseados no traballo en equipo. Un caso diferente é o dos xogos «Guitar Hero», que permiten ao xogador tocar gran número de cancións do seu artista ou banda favorita utilizando unha guitarra con botóns como mando. O compoñente competitivo que rodea ao xogo é máis persoal, está máis orientado á superación fronte á clásica dualidade de vitoria ou derrota.
Este formato tivo gran éxito en plataformas de streaming e youtube, xa que a xente se expuña retos, trataba de espremer os contidos do xogo ao máximo para aumentar a dificultade ata niveis case inhumanos. Por exemplo, a canción «Through the Fire and Flames» de Dragonforce foi moi popular na súa época por aparecer no «Guitar Hero 3» (2007) e ser unha das cancións máis difíciles de tocar na historia dos «Guitar Hero». Rematar de tocar esta canción no xogo acabou considerándose un importante logro persoal na comunidade, e o mundo dos streamers non tardou en xerar retos ao seu redor. Concretamente, o streamer «UKOGmonkey» logrou en abril de 2016 completar a canción ao 100%, sen fallar nin unha soa nota e a unha velocidade mesmo superior á orixinal.
Todo isto xerou unha especie de táboa de marcas, onde os xogadores trataban de superar a marca de streamers e xogadores profesionais. O propio «Guitar Hero 3» integrou no seu xogo unha canción descargable titulada «Do not try this song» (non intentes esta canción) co obxectivo de ofrecer unha experiencia máis crúa e complicada que «Through the Fire and Flames».
Con todo, sería a xente a que realmente poría sobre a mesa os desafíos máis curiosos, creando as súas propias cancións e adaptándoas ao formato de «Guitar Hero». Por exemplo, foi moi popular unha pista descargable que engadía unha dificultade extra á canción «Master of Puppets» de Metallica, e é que cada vez que se escoitaba a palabra «Master», a canción aumentaba a velocidade. A rapidez que chegaba a acadar daba lugar a situacións en grao sumo desafiantes.