As xornadas desenvolveranse nos municipios de Bóveda, Sober e Sarria
20 ago 2025 . Actualizado a las 05:00 h.Os municipios de Bóveda, Sober e Sarria acollerán desde este mércores ata domingo a segunda edición do festival Vendaval, dedicado ao cine de Portugal, no que se proxectarán 17 filmes, dos que cinco son longametraxes e o resto curtametraxes. As xornadas, denominadas Mostra de Cinema Portugués da Ribeira Sacra, terán esta vez unha maior duración, xa que pasarán de tres a cinco días.
Ao igual que na edición anterior, o festival é organizado pola asociación cultural A Memoria é Náufraga, que xestiona na aldea de Xullán —en Bóveda— o centro cultural A Casa da Memoria. As xornadas son coordinadas por Tamara González, unha produtora audiovisual natural de Pantón e afincada en Lisboa. Ademais das proxección de filmes, o programa comprenderá actuacións musicais, obradoiros infantís, xantares populares e coloquios con realizadores, actores e críticos. Todas as actividades serán de acceso gratuíto.
A nova edición do festival ten por lema «Tan cerca, tan lonxe» e, segundo explican os organizadores, está dedicada a «filmes que exploran distancias a través de grandes e pequenas viaxes». A iniciativa, engaden, ten «unha forte compoñente educativa e vocación de intercambio transfronteirizo», e pretende ser «unha mostra de cinema que vai ao encontro de Portugal en Galicia, con especial foco nas semellanzas culturais e lingüísticas».
As xornadas contan co apoio da Vicepresidencia da Deputación lucense, o Instituto Camões de Vigo, os concellos de Bóveda e Sober e a residencia Neuramentalia —no primeiro destes municipios—, así como de diversas empresas. A continuación detállanse as actividades previstas para estas xornadas:
Día 20. Na praza do Toural, en Sober, proxectaranse a partir das 22.00 horas as curtametraxes de animación O campo à beira-mar, de André Ruivo; Fuligem, de Vasco Sá e David Doutel; Lugar em parte nenhuma, de Bárbara de Oliveira e João Rodrigues; Percebes, de Alexandra Ramires e Laura Gonçalves; The Voyager, de João Gonzalez; Viagem a Cabo Verde, de José Miguel Ribeiro, e Ice Merchants, de João Gonzalez.
Día 21. No centro cultural A Palleira, en Sarria, poderá verse ás 22.00 horas o filme Hanami, de Denise Fernandes.
Día 22. Ás 16.30 horas proxectarase no Centro Sociocultural de Bóveda o filme À procura da Estrela, de Carlos Martínez-Peñalver Mas. Ás 21.00 horas ofrecerase no centro A Casa da Memoria, en Bóveda, unha cea con doces e bebidas portugueses. Ás 22.00 poderá verse neste mesmo lugar a película Nayola, de José Miguel Ribeiro. Haberá ademais un coloquio coa actriz Feliciana Délcia Guia e o crítico Martin Pawley. Ás 23.45 comezará unha observación do ceo nocturno dirixida polo astrónomo afeccionado Francisco García.
Día 23. Todas as actividades desta xornada desenvolveranse no centro A Casa da Memoria. Ás 11.00 horas comezará unha sesión de ioga con espada dirixida por Patrícia Castro. Ás 12.00 proxectarase o filme Noite sem distância, de Lois Patiño. Á mesma hora comezará un coloquio co cantante Meduza, actriz da película Nayola. Unha hora despois haberá unha actuación das cantantes Rita Maia e Meduza. Ás 14.30 ofrecerase un xantar popular e ás 17.30 haberá un obradoiro infantil dirixido a nenos de máis de 5 anos. A partir das 18.00 horas poderán verse as películas O campo à beira-mar, Fuligem, Lugar em parte nenhuma, Percebes, The Voyager, Viagem a Cabo Verde e Ice Merchants. Ás 21.00 haberá unha cea popular ás 23.00 proxectarase o filme Grand Tour, de Miguel Gomes, que será presentado por Martin Pawley.
Día 24. As actividades da última xornada centraranse tamén no centro A Casa da Memoria. Ás 11.00 haberá unha nova sesión de ioga con espada a cargo de Patrícia Castro. Ás 12.00 proxectarase Noite sem distância. Ao mesmo tempo haberá un coloquio entre Martin Pawley e o actor e realizador Miguel Nunes. Ás 17.30 haberá un obradoiro infantil para nenos de 5 anos en diante. A partir das 18.00 proxectaranse os filmes O homem de Trás-os-Montes, de Miguel Moraes Cabral; Longe da Amazônia, de Francisco Carvalho, e Kora, de Cláudia Varejão. Ás 20.30 haberá un xantar popular e ás 21.30 poderá verse o filme Deuses de pedra, de Iván Castiñeiras Gallego.