Na capela de San Ramón pode verse o traballo artesán no que un veciño xa falecido investiu máis de vinte anos da súa vida. Ademais, haberá visitas de Papá Noel e os Reis Magos
25 dic 2023 . Actualizado ás 05:00 h.José María Campo Ferreiro (Parada de Sil, 1911-2013) dedicou máis de vinte anos da súa vida a dar forma ao belén que cada Nadal pode verse na capela de San Ramón e que é o maior reclamo da localidade na súa programación para estas datas. Está formado por máis de 200 pezas realizadas con todo tipo de materiais, desde barro sen cocer a cartón, envases de leite, plástico, caixas de froita, metais, tezas ou latas. Nel represéntanse escenas cotiás e oficios da localidade, polo que non falta o barquillero. E tamén hai unha reprodución a pequena escala do mosteiro de Santa Cristina de Ribas de Sil.
A creación artística ocupa máis de 40 metros cadrados. Conta cun sistema de circulación de auga para dar realismo aos ríos e os muíños. Está iluminado para que poida verse ben.
Para conciliar
O belén é probablemente a actividade estrela do Nadal en Parada de Sil, pero non a única. Desde o martes ao 4 de xaneiro haberá talleres para nenos de entre 0 e 16 anos no centro de lecer de Parada de Sil, desde as dez da mañá ata as dúas da tarde. É unha iniciativa pensaba para facilitar a conciliación laboral e familiar dos pais de Parada durante as vacacións escolares. E de paso os nenos pásanllo en grande.
Esa proposta diaria compleméntase con outras que levarán a cabo en días puntuais. Para hoxe mesmo está prevista a visita de Papá Noel. Estará a partir das 17.30 horas no salón de plenos e entregarán aos nenos doces e chocolates. Despois haberá unha merenda aberta a toda a poboación.
O día 30 ás 12.00 horas, a coral Aqua Música percorrerá os bares cantando panxoliñas. Para o día 5 agárdase a chegada dos Reis Magos.
Os nenos e os maiores da residencia fixeron a postal do Nadal
Os veciños de Parada de Sil recibiron a felicitación do Nadal coa que o alcalde, Aquilino Domínguez, quixo desexarlles unhas boas festas. É un debuxo realizado por un grupo de nenos en colaboración cos maiores do xeriátrico Luces do Sil, nunha iniciativa enmarcada nas actividades de convivencia entre ambas as xeracións, que buscan axuntar a sabedoría e experiencia duns coa alegría dos outros. «Na postal aparecen reflectidos os desexos das persoas que a elaboraron e que son os que nos gustarían a todos, alegría, paz, felicidade, respecto, ilusión ou familia», di Domínguez.