O adegueiro californiano Paul Hobbs estará en Quiroga nos encontros ao redor do viño
QUIROGA
Os encontros ao redor do viño que organiza a asociación de comerciantes Quiroga en Marcha contarán cun protagonista de relevancia internacional. O enólogo e adegueiro californiano Paul Hobbs falará sobre a súa aposta polos viños de Ribeira Sacra o próximo 19 de maio dentro dese ciclo. A charla comezará ás 5 da tarde, no hotel Casa do Estanco e a capacidade é limitado. Hobbs está asociado co empresario Antonio López nunha adega acollida á subzona Quiroga-Bibei desta denominación de orixe e situada no municipio de Quiroga.
A web da adega Alvaredos-Hobbs detalla que Hobbs descubriu o potencial desta zona do Sil nunha viaxe por España no 2015. O proxecto permitiu a recuperación dos viñedos da familia de Antonio López en Alvaredos e brindou a Hobbs a oportunidade de promover «un dos recunchos máis antigos e esquecidos da viticultura en España ao honrar a súa historia única contribuíndo a elevar o seu potencial vinícola».
Elixido por «Decanter»
Hobbs é propietario dunha adega en California que elabora os seus viños a partir de viñedos situados en Russian River Valley, West Sonoma Coast e Napa Valley, tres das zonas vitícolas máis prestixiosas dos Estados Unidos. Antes de poñer en marcha o seu propio proxecto en 1991, traballou como enólogo en adegas de renome internacional como Opus One. A filosofía de Paul Hobbs Winery é a mesma que pon en práctica na Ribeira Sacra: coidado meticuloso no viñedo e mínima intervención na adega para producir viños expresivos do seu lugar de orixe.
Hobbs atribúe á súa formación de mocidade na granxa da súa familia a capacidade que se lle atribúe para identificar viñas especiais nas que se dan as características para producir viños de clase mundial. A crítica británica Sarah Jane Evans incluíu un das marcas que elabora este enólogo en Quiroga no top 10 de viños españois do 2023 publicado na revista Decanter.