O centro incorpora unhas catrocentas pezas cedidas por un científico do CSIC
28 mares 2024 . Actualizado ás 10:44 h.O museo municipal de xeoloxía e paleontoloxía de Quiroga mostrou este mércores por primeira vez —nunha xornada de portas abertas— a súa renovada colección de minerais, que acaba de enriquecerse considerablemente cunha nova doazón. O pasado outubro, o xeólogo e paleontólogo Juan Carlos Gutiérrez-Marco —natural de Rábade— cedeu ao Concello a súa colección persoal, formada por unhas catrocentas pezas, para que fosen exhibidas no museo. «A colección de minerais que tiñamos antes no museo era de arredor de duascentas pezas», sinala o director do centro, Ramón Vila.
Gutiérrez-Marco —investigador do Instituto de Geociencias do Consello Superior de Investigacións Científicas (CSIC) e membro do comité científico do geoparque Montañas do Courel— formou esta colección con mostras recollidas ao longo de moito tempo en todos os continentes. «Os minerais proceden de moitísimos lugares, como Tanzania, Madagascar, Congo, Estados Unidos, Canadá, Arxentina, Chile, Guatemala ou China, por exemplo», explica Vila. Algunhas as pezas estaban identificadas como procedentes da Unión Soviética, xa que foron recollidas en Siberia antes da disolución deste Estado, a finais de 1991. «Esta colección é froito dun traballo de investigación de moitos anos e para un museo pequeno como este é un verdadeiro luxo», comenta o director, quen puntualiza que non todas as pezas doadas por Gutiérrez-Marco son de distintos minerais. «Hai un certo número de mostras diferentes do mesmo mineral, pero tamén hai moitas pezas que son realmente rechamantes e espectaculares», agrega.
Instalación complexa
Facer sitio para estes materiais no museo municipal foi unha tarefa ardua, di así mesmo Vila. «O edificio ten unhas dimensións limitadas e está aproveitado ao máximo, e deu moito traballo habilitar o espazo para expoñer estas novas pezas, pero finalmente conseguiuse», sinala. Os responsables do centro habíanse proposto mostrar ao público a nova colección esta semana Santa, un obxectivo que tamén puido cumprirse.
Para instalar a colección foi necesario decidir antes o criterio de ordenación das pezas para mostralas aos visitantes. Despois de considerar varias posibilidades, decidiuse dividilos por grupos, como carbonatos, silicatos, sulfatos ou arseniatos. Ramón Vila apunta que aínda que neste acervo figuran minerais de todo tipo, tamén hai algúns que son moi característicos do territorio do geoparque Montañas do Courel, como é o caso das galenas.
Os responsables do museo municipal de xeoloxía confían en que o atractivo do centro creza dunha forma significativa con esta achega. «Temos moitas visitas escolares e cando se corra a voz de que no museo hai esta colección de minerais tan extensa e tan variada esperamos que haxa moita máis xente que se interese por vela», apunta Vila.
HORARIO DE VISITAS
Os museos municipais de xeoloxía e etnografía amplían os seus horarios de visita este xoves, mañá e o sábado, abrindo de 11.00 a 13.30 horas e de 17.00 a 19.00 horas. O prezo da entrada é dun euro por persoa. Para concertar visitas noutros horarios —para grupos de polo menos dez presentas— hai que chamar ao número de teléfono 982 435 125.