Outra fuga provoca o cuarto corte de auga na mesma zona de Monforte nunha semana

Unha avaría deixou este domingo sen auga durante horas por centos de veciños de Monforte. Debeuse a unha rotura na tubaxe da rúa Escultor Francisco Moure, unha zona moi castigada por este tipo de incidencias. A deste domingo é a cuarta que se rexistra en só unha semana e nesa mesma parte do centro urbano.

O rebentón tivo lugar un pouco antes das dez da mañá no cruzamento entre Francisco Moure e a rúa Castelao, moi preto do paso a nivel . Provocou unha fuga de auga importante que alagou esa parte da rúa Castelao e que non cesou ata que o persoal de Aqualia empezou a traballar sobre o terreo.

A rotura da tubaxe deixou sen auga Francisco Moure e algunhas zonas próximas, pero os traballadores de Aqualia puideron reabrir pola mañá a subministración de forma temporal e precaria. A auga chegaba ás casas, pero en moi pouca cantidade.

No Concello deron a avaría por resolta ás seis da tarde, oito horas despois de que rexistrase a fuga.

As tubaxes da traída de Monforte sofren rebentóns frecuentes a causa do mal estado que presenta boa parte da rede. O Concello ten en marcha investimentos importantes para renovar o sistema de subministración de auga.

---

---

---