A Pobra do Brollón recupera o seu casco antigo, segundo máis importante de Lemos no Medievo
MONFORTE DE LEMOS
O camiño de Inverno e o tirón turístico da Ribeira Sacra poden contribuír á rehabilitación de vivendas
05 may 2024 . Actualizado ás 15:44 h.O Camiño de Inverno estimula a recuperación do casco antigo da Pobra do Brollón, unha das escalas da ruta xacobea que parte do Bierzo e atravesa Valdeorras, a Ribeira Sacra e a comarca do Deza antes de desembocar en Santiago. «No casco vello hai casas abandonadas que pensamos que poderían ser atractivas para a súa rehabilitación co pulo do turismo», apunta o alcalde, José Luis Maceda. As obras destinadas á zona antiga fináncianse con fondos do Plan Único da Deputación de Lugo e cunha achega municipal. Ata a data levaron a cabo dúas fases do proxecto, que permitiron dotar a estas rúas dun pavimento que imita o empedrado tradicional e instalar varandas de madeira nos laterais de varios tramos.
A actividade comercial e hostaleira foise desprazando co tempo á avenida principal que atravesa a capitalidade do municipio. O golpe máis recente á zona vella foi o traslado a esa travesía urbana das feiras mensuais, que se desenvolvían nuns antigos pendellos próximos ao río. O actual goberno municipal xa protagonizou un intento de revalorizar a zona histórica no 2020, cando apostou pola compra dunha antiga vivenda da zona vella que ía ser rehabilitada para convertela en albergue de peregrinos. A adquisición, con todo, paralizouse por un problema alleo ao Concello. Esta circunstancia deixou en suspenso o convenio coa Xunta que ía facilitar o financiamento das obras.
O albergue habilitouse finalmente nun inmoble situado na zona escolar, na entrada principal da Pobra. O paulatino aumento do número de peregrinos que atravesan o Camiño de Inverno e o crecente tirón da Ribeira Sacra impulsaron nos últimos meses o acondicionamento de vivendas particulares con fins turísticos.
A zona vella da Pobra tivo noutros tempos unha gran notoriedade no conxunto da comarca. Segundo o historiador Luis Manuel Ibáñez Beltrán, na Idade Media foi o segundo núcleo urbano máis importante da Terra de Lemos despois de Monforte. Este investigador, autor dunha tese doutoral sobre a historia medieval da comarca, sinala que A Pobra chegou a ter nesa época unha poboación case tan importante como a de Monforte, o que a distingue doutras localidades do sur lucense.