A Fonsagrada e O Courel, líderes lucenses en rexistros de fauna e flora sobre o terreo

Os municipios da Fonsagrada e Folgoso do Courel son con gran diferenza os líderes da provincia de Lugo en Natusfera, unha aplicación gratuíta para teléfonos móbiles na que numerosos voluntarios rexistran e divulgan todas as especies de animais, plantas e fungos que observan ou fotografan sobre o terreo. Aínda que os datos poden variar dun día para outro, na Fonsagrada rexistráronse ata onte 8.845 observacións de 1.742 especies de todo tipo. Delas, 8.250 son de animais —correspondentes a 1.470 especies—, 314 de plantas —de 166 especies— e 273 de fungos de 101 especies. En Folgoso do Courel rexistráronse 8.511 observacións de 1.666 especies. Destas cifras, 3.795 observacións son de animais pertencentes 902 especies; 3.879, de plantas de 502 especies e 808 de fungos de 257 especies.

A aplicación Natusfera —encadrada nunha rede internacional denominada iNaturalist— é promovida polo Centro de Investigación Ecolóxica e Aplicacións Forestais, un consorcio público vinculado ao CSIC ou Consello Superior de Investigacións Científicas. Ata o momento esta ferramenta hase utilizado para rexistrar e difundir observacións de animais, vexetais e fungos en 16 municipios da provincia.

Primeiros postos

Despois da Fonsagrada e Folgoso do Courel, os concellos lucenses que presentan un maior número de rexistros en Natusfera son os de Outeiro de Rei —cun total de 3.593 observacións—, Pedrafita do Cebreiro —con 2.154—, Begonte —con 1.700— e Guitiriz, con 1.414. En todos os demais, o número de observacións publicadas por voluntarios queda por baixo do milleiro. O que menos ten é o de Xermade, con 28. Na zona sur da provincia, exceptuando o caso de Folgoso do Courel, por agora non se publicaron rexistros.

A plataforma Natusfera —a través dun apartado denominado «Explora»— permite discriminar as procuras de rexistros por municipios ou por provincias. Na de Lugo rexistrouse ata este sábado 59.272 observacións de 4.915 especies. Con iso sitúase no terceiro posto da comunidade. O primeiro corresponde á provincia da Coruña, con 96.208 rexistros de 5.751 especies. O segundo é para a de Pontevedra, con 64.877 observacións de 5.316 especies. No último lugar atópase a provincia de Ourense, onde hai 25.009 rexistros de 3.171 especies.

As observacións que rexistran os voluntarios e que se poden consultar na aplicación clasifícanse segundo os diferentes tipos de animais, plantas e fungos. En canto á fauna, como é lóxico, os rexistros máis numerosos adoitan ser os de insectos. Se se busca o número de observacións do lobo ibérico, a provincia galega con máis rexistros é a de Pontevedra, cun total de 577; séguenlle a de Ourense, con 249, e a de Lugo, con 43. A que menos ten é a da Coruña, con 31. A gran maioría destas observacións son de pegadas ou de excrementos dos animais.

Rexistros de oso pardo

No que respecta ao oso pardo, cuxa presenza se incrementou considerablemente nas serras galegas nos últimos anos, en Natusfera só se atopan por agora tres rexistros efectuados na comunidade. Dous deles foron realizados na provincia de Lugo, un dos cales se sitúa no municipio de Pedrafita do Cebreiro e o outro, en Folgoso do Courel. A terceira observación desta especie ameazada foi consignada na serra do Invernadeiro, na provincia de Ourense.

Os usuarios da aplicación Natusfera, por outra banda, non só rexistran especies identificadas con claridade. Tamén poden divulgar imaxes de animais, vexetais e fungos que non puideron recoñecer e solicitar a axuda doutros usuarios para identificar estas especies.

  

 

---

---

---