O suceso produciuse no corredor de Monforte a Lalín
26 feb 2024 . Actualizado ás 19:42 h.Un condutor resultou ferido nun accidente que se produciu este luns na estrada CG-2.1 ao seu paso polo municipio de Chantada . O suceso consistiu nunha saída de vía dun automóbil que se rexistrou entre os quilómetros 32 e 33 deste viario, á altura da localidade do Mato, ao redor das sete menos cuarto da tarde. Unha persoa que chamou por este motivo aos servizos de urxencia do 112 avisou de que ao parecer o condutor non conseguía abrir a porta do vehículo, polo que se avisou aos bombeiros do parque comarcal de Chantada, por se fose necesario realizar unha excarceración.
Con todo, a mesma persoa volveu chamar pouco despois para sinalar que o automobilista conseguira saír do coche polos seus propios medios, polo que a intervención dos bombeiros non foi necesaria.
O condutor accidentado foi trasladado pouco despois nunha ambulancia para recibir asistencia médica no punto de atención continuada de Chantada. Ao lugar do accidente, ademais do persoal de urxencias sanitarias, acudiron efectivos da Garda Civil de Tráfico e de Protección Civil. O vehículo sufriu un envorco e quedou fóra da calzada, polo que non chegou a causar problemas de interrupción do tráfico.