A plataforma Chantada Quere Sanidade denuncia que este martes volvía haber só dúas consultas médicas abertas
20 dic 2023 . Actualizado ás 05:10 h.A plataforma chantadina en defensa da sanidade pública denuncia ante a Valedora do Pobo a situación na que se atopa o centro de saúde desta localidade. O colectivo Chantada Quere Sanidade xa convocou dúas protestas na rúa, que se celebraron o pasado mes de novembro, para reivindicar que se cubran as baixas de médicos e enfermeiros para evitar que se deteriore o servizo.
Na queixa que presentaron na oficina da Valedora, e que consta como rexistrada este luns, este colectivo cidadán denuncia «que este centro de saúde non conta co persoal medico nin de enfermería dabondo para dar resposta a unha poboación de preto de 8.000 habitantes, cifra aínda maior se falamos da atención de urxencias».
A modo de exemplo, os autores deste escrito de denuncia explican que este martes só había dous médicos pasando consulta, o que fai que cada dun poida ter que atender a ao redor de 70 pacientes na súa xornada laboral.
En canto ás urxencias, os autores da denuncia explican á Valedora que o punto de atención continuada (PAC) situado no centro de saúde de Chantada, que atende os casos fóra de horario de consulta deste municipio e do de Carballedo, «tivo tardes nas que non foi cuberto por ningún médico», así que esta zona quedou sen cobertura próxima entre primeira hora da tarde e ata a madrugada.
Nestas circunstancias, na plataforma Chantada Quere Sanidade aseguran que non son poucos os pacientes que deciden acudir directamente ao Hospital Público de Monforte para ser atendidos no seu servizo de urxencias, «saturándoo con casos que podían ser atendidos correctamente en atención primaria».
Volta de vacacións
A Consellería de Sanidade anunciou a semana pasada que este luns se recuperaba a normalidade no centro de saúde, porque se tiñan que reincorporar dous médicos que estiveran gozando uns días de vacacións aos que tiñan dereito. En Sanidade aseguran que cobren todas as vacantes deste tipo que poden e que as que quedan sen atender é porque non hai máis médicos nas lista de substitución.