A previsión é contratalas a comezos de ano e que se realicen na primavera ou no verán
22 novs 2023 . Actualizado ás 19:35 h.A Xunta de Galicia licitou, a través da Consellería de Infraestruturas e Mobilidade, obras de mellora do firme na vía de altas prestacións que comunica Monforte co alto do Faro, nos límites de Chantada co municipio pontevedrés de Rodeiro, e na estrada LU-533 ao seu paso polos concellos de Chantada e O Saviñao. O prezo do contrato é de algo máis de dous millóns de euros e o prazo de execución de seis meses.
As obras levarán a cabo nun tramo de 13,5 quilómetros do corredor e noutros 4,4 quilómetros da estrada LU-533, desde o núcleo urbano de Chantada ata Escairón, capitalidade do municipio do Saviñao. As empresas interesadas en optar ao concurso teñen de prazo ata o 18 de decembro para presentar as súas ofertas. Os traballos adxudicaranse a comezos de ano para que poidan levar a cabo na primavera ou verán, e consistirán na reposición do firme e o repintado da sinalización horizontal nos tramos elixidos de ambos os viarios.