A rede de Internet ultrarrápido chega ás primeiras 100 vivendas de Carballedo
CARBALLEDO
O obxectivo é acabar chegando a 1.500 casas do municipio
14 abr 2023 . Actualizado ás 13:26 h.A empresa Adamo acaba de conectar a primeira fase da rede de Internet por fibra óptica do municipio de Carballedo . Na empresa explican que esta primeira fase chega a preto dun centenar de vivendas situadas neste municipio. O seu obxectivo é acabar chegando a 1.500. Esta rede de fibra óptica permite conexións a velocidades de transmisión de datos moito máis grandes que as dispoñibles ata agora.
O servizo que ofrece esta nova rede acada velocidades de ata 1.000 megabits por segundo, unha velocidade que ata agora só era posible conseguir nalgunhas das principais cidades galegas.
O responsable de Adamo en Galicia, David Llano , desprazouse este xoves a Carballedo para comunicar oficialmente ao alcalde, Julio Yebra-Pimentel, o aceso da rede local. Nunha reunión aberta, á que asistiron tamén algúns veciños, Llano explicou en detalle como funciona esta rede e como avanza o traballo para estendela a outros puntos do municipio, ata acadar o obxectivo de 1.500 vivendas cubertas.
Un de 35
Carballedo é un dos 35 municipios da provincia de Lugo incluídos no plan de despregamento de fibra óptica da empresa Adamo. A súa extensión está en marcha e desde o 2018 permitiu facer chegar este servizo a máis de 70.000 vivendas neses municipios. Para financiar este despregamento, Adamo investiu 20 millóns de euros e contratou a 300 traballadores en tarefas de enxeñería, mantemento e comercialización.
Adamo é ademais o adxudicatario da última convocatoria de axudas do Estado e da Unión Europea para a extensión de redes de acceso ultrarrápido a Internet en zonas na que non están dispoñibles. Mediante un dos denominados programas únicos, cun orzamento que mestura fondos públicos e privados que neste caso ascende a 17,5 millóns de euros, Adamo levará a fibra óptica a 33 fogares rurais da provincia de Lugo entre este ano e o 2024.