O investigado polo incendio do Lor tratou de apagalo cun extintor e un batefuegos

O veciño da Pobra do Brollón investigado pola súa responsabilidade no incendio forestal que a finais de agosto queimou 1.100 hectáreas nese municipio e no de Quiroga é un traballador municipal. Conducía un tractor con rozadora propiedade do Concello da Pobra do Brollón e asegura non ter constancia de que fose o seu vehículo o que provocou aquel incendio.

O incendio empezou o 25 de agosto nunha pista sen asfaltar próxima á vila de Golmar. Todo apunta a que as primeiras chamas prenderon ao paso dun dos tractores de roza que o Concello enviara aquel día para traballar a esa parte da parroquia de Abrence.

O traballador investigado é o que manexaba un deses dous tractores e asegura non saber por que a Garda Civil pensa que foi o seu vehículou o que provocou o lume. «Pasou o primeiro tractor e despois pasei eu e despois dunha curva volvín para atrás para darlle outra pasada e foi cando vin o lume -asegura- o que non vin é se o lume o provocou o tractor que levaba eu ou non».

En canto se deron conta do que pasaba, tanto el como o seu compañeiro reaccionaron de inmediato e intentaron apagar o lume. Para facelo utilizaron o equipamento que levaban por se sucedía algo así, un extintor e un batefuegos en cada un dos dous tractores. O investigado engade que en calquera caso o responsable daquela roza non era el nin tampouco o seu compañeiro, porque foron alí porque lles mandaron ir.

Sete días antes, o 18 de agosto, o Concello da Pobra do Brollón fixera público un bando no que advertía que dado o risco de incendio que había aqueles días quedaban suspendidos as rozas cos tractores municipais. No bando, o alcalde, José Luis Maceda, engadía que estaban pendentes da evolución do risco de incendio para decidir cando renovar eses traballos.

O luns seguinte, o risco xa baixara de extremo a alto, así que no Concello decidiron volver sacar os tractores. Iso si, equipados polo si ou polo non cos batefuegos e os extintores.

---

---

---