O alcalde pide «máximo esforzo para o aforro» ante a seca, mentres que os concellos de Quiroga e Sober xa fixeron chamamentos para moderar o gasto
20 ago 2025 . Actualizado á 16:08 h.O Concello da Pobra do Brollón, mediante un bando da alcaldía, prohibiu utilizar a auga da traída municipal para outros usos diferentes do consumo doméstico. A medida tómase, segundo precisa o documento, «tendo en conta a época estival e ante a previsión de escaseza de auga pola seca» e en aplicación da ordenanza fiscal reguladora da taxa por subministración de auga.
O alcalde, José Luis Maceda, precisa que non permite utilizar a auga da traída para a rega de hortas e xardíns, encher piscinas particulares e outros elementos similares, lavar vehículos e fachadas de edificios ou baldear patios e outros espazos. No bando advírtese que toda infracción contra esta orde será sancionada segundo o disposto na referida ordenanza municipal. Así mesmo, sinala que o Concello controlará o consumo de auga nos edificios e instalacións municipais e os espazos públicos en xeral, e que se vixiarán as perdas na rede de abastecementos.
«Máximo esforzo»
Doutra banda, o rexedor recomenda a todos os veciños «que realicen o máximo esforzo para o aforro da auga». Aínda que o bando só se aplica nas parroquias que contan con subministración municipal —agrega—, o rexedor lembra aos veciños das localidades que teñen sistemas propios de abastecemento «que a seca afecta a todos por igual e polo tanto é fundamental un uso responsable dun ben tan prezado e escaso».
O da Pobra do Brollón é o primeiro concello do sur lucense que prohibiu expresamente usar a auga da traída municipal fóra do consumo doméstico a causa da seca que se rexistra este verán. Pero os de Quiroga e Sober xa recomendaron aos veciños que moderen o gasto. A principios de mes, o alcalde do primeiro destes concellos publicou un bando no que pedía «un uso responsable» da auga e evitar regas innecesarias en hortas e xardíns, así como utilizar lavadoras e lavalouzas con carga completa, reducir o tempo no uso da ducha ou revisar posibles fugas as instalacións domésticos.
O pasado día 16, por outra banda, o Concello de Sober fixo un chamamento a través das súas redes sociais para pedir igualmente un consumo responsable «ante a prolongada situación de seca que estamos a vivir e coa fin de garantir o abastecemento da auga a toda a poboación e preservar este recurso esencial». O comunicado inclúe recomendacións análogas ás do bando do alcalde de Quiroga.
As últimas precipitacións rexistráronse a finais de xuño en Ribas de Sil e Chantada
As estacións meteorolóxicas de Meteogalicia no sur da provincia non detectaron practicamente nada de choiva desde o inicio do verán. A partir do 21 de xuño, só nas estacións de San Clodio de Ribas de Sil e o monte Faro —en Chantada— apreciáronse unhas precipitacións mínimas. Na primeira delas rexistráronse o día 24 dese mesmo mes 1,2 litros por metro cadrado. Na segundo destas estacións meteorolóxicas, o único rexistro durante este período foi de 1,4 litros por metro cadrado o 26 de xuño.
Nos demais observatorios repartidos por este territorio non se rexistrou ningunha cantidade apreciable de auga de choiva en todo o que vai de verán. Nin sequera no da Cunchada —no municipio de Quiroga—, a pesar de acharse a escasa distancia do de San Clodio, detectouse ningunha precipitación nesas datas. O mesmo ocorreu na outra estación situada en Chantada, a de San Fiz, que se atopa a beiras do Miño.
Outras estacións
As demais estacións de Meteogalicia situadas nestas comarcas son as do centro urbano de Monforte, o monte Marroxo —no mesmo municipio—, Bóveda, Xabrega —en Sober—, A Míllara —en Pantón— e Folgoso do Courel. Desde o comezo do período estival tampouco se rexistrou ningunha precipitación no observatorio de Ponte dá Boga, no municipio ourensán de Castro Caldelas.