O novo itinerario, que une as localidades de San Tomé e Bembibre, será presentado cun percorrido guiado o próximo 7 de xuño
24 may 2025 . Actualizado á 05:00 h.O ano pasado inaugurouse o primeiro itinerario sinalizado de sendeirismo do municipio de Taboada, a ruta chamada A Embelesadora, habilitada por iniciativa do consorcio de turismo da Ribeira Sacra. Agora acábase de acondicionar unha segunda ruta que leva o nome de O Camiño dos Mouros e discorre entre as parroquias de San Tomé de Carballo e Bembibre. O itinerario foi deseñado e sinalizado nunha intervención que contou cun presuposto de 5.5572 euros. O proxecto foi financiado dentro dunha liña de subvencións da Xunta para territorios pertencentes a Rede Natura, cunha axuda de 4.065 euros dos fondos europeos Feader.
A nova ruta ten unha lonxitude de 1,7 quilómetros. Segundo indica o tenente de alcalde José Portela, o seu nome débese a que pasa preto dun manancial coñecido como Fonte dous Mouros. «Este itinerario pretende axudar a difundir o patrimonio natural e paisaxístico do municipio, porque pasa por zonas onde hai moitos castiñeiros e carballos, algúns deles centenarios», explica. O itinerario, engade, deseñouse aproveitando un camiño tradicional e na sinalización prestouse especial atención á microtoponimia da zona. O percorrido comeza na propia localidade de San Tomé e remata na de Bembibre, onde se conserva a notable igrexa románica de San Pedro.
O próximo 7 de xuño farase unha presentación da ruta cun percorrido guiado cuxo horario se anunciará máis adiante. A camiñada, di Portela, será guiada por unha bióloga e unha especialista en toponimia, que se encargarán de explicar aos participantes, respectivamente, as características do medio natural deste territorio e as peculiaridades dos nomes de lugar.
O Concello de Taboada, sinala así mesmo o tenente de alcalde, ten previsto crear outras rutas de sendeirismo para aproveitar mellor este recurso turístico. «No municipio hai moitos lugares de interese e pensamos acondicionar outros itinerarios para que se coñezan mellor», comenta. Este ano tamén se pretende habilitar un paseo peonil desde a capital do concello ata o lugar da Medela, onde se atopan as piscinas municipais, o campo de fútbol, e un parque infantil. «Xa estamos en trámites para habilitar este paseo e nesa intervención investiranse uns 1.200 euros», di así mesmo Portela.