O ministerio pon por fin diñeiro para arranxar a estrada N-120 no sur de Lugo
LEMOS
Dentro dun proxecto de 27 millóns de euros que inclúe tamén a primeira reparación da autovía de Carballedo
05 jun 2024 . Actualizado á 17:51 h.O Ministerio de Transportes e Movilidad Sostenible investirá preto de 27 millóns de euros na reparación das calzadas dos tramos da maior parte das estradas nacionais que pasan pola provincia de Lugo. Este diñeiro permitirá actuar, entre outras, na autovía A-54 (Lugo-Santiago) e nas estradas N-540 (Lugo-Ourense) e N-120 (Logroño-Vigo), tres das que presentan problemas máis serios por falta de mantemento. O ministerio non detallou a repartición deste investimento por estradas, así que resulta difícil avaliar se este proxecto cumpre coas expectativas. Por exemplo, hai case un ano e medio o ministerio anunciara 15,6 millóns de euros para arranxar só a parte lucense da N-120.
En calquera caso, esta é unha dos investimentos máis importantes anunciada polo Ministerio de Transportes desde que se xeneralizaron as críticas polo calamitoso estado do firme da maior parte das estradas estatais da provincia de Lugo. O que fixo onte o Goberno central foi aprobar no consello de ministros a autorización para que Transportes saque a concurso por un prezo máximo de 26,8 millóns de euros a reparación de 267,8 quilómetros de estradas da rede estatal na provincia de Lugo. A maioría, 221 quilómetros, son de estradas convencionais e os 46 restantes de autovía. Ningún destes últimos están na A-6, a autovía en peor estado de toda a provincia, para a que o ministerio xa anunciou investimentos cuantiosos en xullo do 2023.
Na información facilitada este martes polo Ministerio de Transportes hai poucos detalles máis. O máis importante, o dos prazos. Esta resolución do consello de ministros prevé que o proxecto estea rematado nun prazo de tres anos, aínda que autoriza unha posible prórroga de dúas e unha máis adicional dun máximo de nove meses.
O que non se sabe
Así as cousas, falta por saber canto diñeiro se investirá en cada estrada, pero tamén en que tramos concretos de cada unha delas está previsto actuar ou en que orde cronolóxica levarán a cabo as obras. Para coñecer esta parte da información probablemente haxa que agardar a que se resolva a licitación e o proxecto teña xa un contrato e unha construtora que o realice.
Á espera de que se concreten todos os detalles, esta é a lista completa das vías de comunicación que entran neste proxecto millonario de reparación de firmes.
Autovías
- A-54 (Lugo-Santiago). A A-54 leva nove anos aberta e esta vai ser a súa primeira grande operación de mantemento. Haberá obras nos 38 quilómetros entre Lugo e a provincia da Coruña. Nos 11 quilómetros entre o Monte Meda e Guntín (do quilómetro 12,2 ao 23), o ministerio mellorará os sistemas de contención para mellorar a visibilidade.
- A-56 (Lugo-Ourense). O único tramo construído desta autovía, o dos 8,8 solitarios quilómetros do municipio de Carballedo, leva tres anos e nove meses en servizo e a súa utilidade é reducida, igual que o seu tráfico, pero xa precisa traballos de mantemento. Tamén está incluído neste proxecto.
Estradas
- N-540 e N-540A. A estrada Lugo-Ourense, a N-540, é unha das que peor estado presentan na moi deteriorada rede estatal de estradas de Galicia. As súas enormes fochancas encheron páxinas de xornais antes da pandemia e os parches aplicados hai uns anos só taparon os máis profundos mintas os tramos que estaban menos mal ían empeorando. En agosto do 2023 saíu a concurso un plan de obras de reparación de firma específico para esta estrada, cun prezo máximo 12,4 millóns de euros.
- N-120. A estrada N-120 percorre o sur da provincia de Lugo entre Quiroga e Pantón, e ten tramos perigosos polas súas curvas e pendentes, e agora tamén polas súas fochancas. Nos 10 quilómetros de costa sinuosa entre o alto de Guítara os condutores sempre tiveron que extremar o coidado. Agora teñen que estar pendentes tamén de esquivar as partes máis deterioradas do asfalto. En xaneiro do 2023, o ministerio anunciou que investiría 15,6 millóns de euros nunha reparación integral e en profundidade entre os puntos quilométricos 472,8 ao 535,2. É dicir entre un punto do municipio de Quiroga próximo ao límite coa comarca de Valdeorras ata seis quilómetros antes do alto de Guítara, no termo municipal de Pantón, despois de pasar pola Pobra do Brollón e Monforte. Naquel momento, a costa de Guítara aínda non empezara a deteriorarse e estaba mellor que agora. O ministerio terá que aclarar se aquel proxecto de hai ano e medio entra neste novo ou se se trata de actuacións distintas.
- N-547. Na estrada nacional de Lugo a Santiago (N-547) o tramo tradicionalmente en peor estado é o que comunica Palas de Rei e Melide.
- N-640. A N-642, cuxo tramo lucense nace en Ribadeo e remata na intersección de San Cibrao coa LU-862, é a principal vía de comunicación da Mariña
- LU-12. A LU-121? é a autovía urbana que conecta polo sur de Lugo a A-54 coa estrada N-540. Ten algo menos de catro quilómetros de lonxitude e foi inaugurada no ano 2015.