A proba de mototurismo consiste nun percorrido de 336 quilómetros pola Ribeira Sacra e a comarca da Ulloa, no que se poderá elixir itinerario
06 may 2024 . Actualizado ás 19:10 h.Moteiros de toda España participarán este sábado na cuarta edición da Ruta Castrexa, unha proba de mototurismo que discorrerá pola Ribeira Sacra. A organización corre a cargo da Asociación Motorista Lucense, que conta co apoio das áreas de Deportes e Turismo da Deputación. A proba foi presentada na capital da provincia por Aurelio Nóvoa e Mónica López —representantes da asociación organizadora—, o vicepresidente do organismo provincial, Efrén Castro, e o deputado de Promoción Económica e Social, Pablo Rivera.
Na proba, que será puntuable para a Copa de España de Mototurismo, os participantes deberán completar un percorrido de 336 quilómetros polas comarcas da Ulloa e Lemos, así como por outros territorios da Ribeira Sacra. Para iso —segundo precisan os organizadores—, poderán elixir o itinerario que consideren máis adecuado para as súas características de condución.
O punto de saída e chegada da proba estará en Lugo. Os participantes terán que deterse a selar os seus «pasaportes de ruta» nuns postos de control que estarán instalados en Vendas de Narón —en Portomarín—, Palas de Rei, Antas de Ulla, Limiñón —en Chantada—, Ribas de Sil, Augas —Santas en Pantón— e Becerreá.
Os organizadores precisan que a proba non consiste nunha carreira, polo que non haberá clasificacións nin premios. Aos participantes que presenten os certificados do seu paso por todos os controis se lles entregará unha medalla como testemuño de que completaron a ruta.
Na presentación, Efrén Castro resaltou o traballo realizado pola Asociación Motorista Lucense para a consolidación da proba e lembrou que a Deputación a apoiou desde os seus inicios, fai catro anos. Así mesmo, destacou «as sinerxias entre deporte e turismo, especialmente en modalidades como o mototurismo, unha disciplina en auxe que, con esta proba, proxecta o patrimonio natural e cultural das comarcas do sur de Lugo a través da experiencia de moteiras e moteiros de todo o Estado».