Os últimos 526 metros encarecen en 110.439 euros a nova tubaxe xeral de Monforte
LEMOS
Aqualia expón levala a San Vicente desde a rúa Zapardiel polo parque da ladeira
30 abr 2024 . Actualizado á 12:04 h.Aqualia solicita autorización para o cambio de trazado do último tramo da nova tubaxe xeral de abastecemento de auga que comezou a instalar hai ano e medio no centro urbano de Monforte. A modificación do proxecto afecta á conexión cos depósitos situados no conxunto monumental de San Vicente e a súa aprobación foi incluída na orde do día do pleno celebrado a última hora da tarde de onte. O trazado proposto implica, segundo a documentación achegada pola empresa, un encarecemento significativo do custo das obras. Os últimos 526 metros do trazado da condución incrementan en 110.439 euros o presuposto inicial, que fora fixado en 1.671.671 euros.
Os gastos da substitución da antiga tubaxe de fibrocemento por unha nova fabricada en fundición corren a cargo de Aqualia. A cantidade destinada inicialmente ás obras é a que debía abonar ao Concello de Monforte a empresa, en cumprimento dunha sentenza de febreiro do 2020, polos investimentos que comprometera e que non se chegaron a efectuar entre os anos 2001 e 2023. Aqualia propón agora que eses 110.439 euros de sobrecusto computen tamén «con cargo ao plan de investimentos cuxa valoración final está pendente de resolución xudicial».
A reclamación que formulou o Concello por vía xudicial cifraba en 2.221.980 euros o investimento pendente, pero a sentenza establece que Aqualia xustificou desembolsar 734.276 euros en actuacións de mellora da rede de subministración. Posteriormente foi presentado un recurso municipal, aínda pendente de resolución, para que sexa recoñecida a débeda total reclamada e non só os 1,6 millóns. Do fallo que emita o tribunal dependerá tamén contía dos intereses de demora que deberá pagar a concesionaria, que computan desde o requirimento formal da débeda por acordo do pleno en marzo de 2018.
Lista na rúa Morín
A instalación dunha nova tubaxe xeral con cargo aos investimentos pendentes de Aqualia recibiu o visto e prace da corporación en agosto do 2022. As obras deron comezo a finais de novembro dese ano preto do campo de fútbol de Ribas Altas e a estas alturas a condución está practicamente lista en toda a rúa Morín. Os seguintes pasos serían atravesar o tramo final de Doutor Casares e, á altura do cruzamento con Curros Enríquez, enlazar a través por esta última rúa con Leopoldo Calvo Sotelo.
O proxecto aprobado no 2022 prevía conectar a nova tubaxe desde Calvo Sotelo con San Vicente a través da rúa Real, pero a empresa propón outro trazado que iría do cruzamento de Doutor Casares coa rúa San Pedro á rúa Zapardiel. Alí desviaríase cara á chaira na que se atopa a zona de aparcadoiro, onde atravesaría o arroio encostada á ponte. Desde ese punto ascendería ata os depósitos de distribución paralela á tubaxe de fundición de abastecemento que xa existe, denominada de Veiga e que foi instalada hai aproximadamente 70 anos.
O novo trazado aproveita unha gabia xa escavada para non afectar o patrimonio
A solicitude de modificación que tiña previsto resolver onte o pleno é a segundo que se introduce no proxecto da nova tubaxe xeral, que aínda deberá completarse noutra fase mediante a conexión do centro urbano cos depósitos mais próximos á planta potabilizadora de Ribas Altas. O primeiro cambio autorizouse a comezos do pasado ano e permitiu esquivar as autorizacións da Xunta no tramo final da rúa Morín, ao derivar a condución por un vial paralelo cuxa titularidade é municipal. No tramo máis próximo a San Vicente, Aqualia sostén que a revisión do trazado permite «diminuír no posible afeccións que puidesen aparecer tanto para os cidadáns como para o patrimonio arqueolóxico que puidese atoparse na zona».
A zona da ladeira pola que ascendería desde a rúa Zapardiel xa foi escavada no seu día e as obras aproveitaríanse para ocultar a tubaxe existente que permanece á vista nalgúns tramos. Sobre o incremento do gasto corresponde a «disposicións adicionais sobrevindas de diferentes administracións» que a empresa desagrega na solicitude de autorización.
Conexión con Veiga
Os últimos datos sobre a execución das obras que trasladou Aqualia ao Concello cifraban en 3.642 metros a superficie instalada da nova tubaxe de fundición. Tamén levou a cabo unha conexión coa antiga captación do Cabe situada na parroquia de Veiga, na Pobra do Brollón, para garantir a subministración en caso de rotura coa condución procedente de Ribas Altas.