O titular de Sanidade destapou a placa dedicada o médico monfortino
26 mares 2024 . Actualizado ás 10:17 h.O conselleiro de Sanidade en funcións, Julio García Comesaña, descubriu este luns no Hospital Universitario Lucus Augusti (HULA) a placa que dá a un dos seus pavillóns o nome do médico nado en Monforte José Goyanes Capdevila, que faleceu en 1964 e foi considerado no seu tempo o cirurxián español de maior prestixio. Comesaña presidiu ese acto co gallo dunha visita ás instalacións do laboratorio de microbioloxía do complexo hospitalario lucense, na que estivo acompañado polo xerente da área sanitaria provincial, Ramón Ares.
O doutor Goyanes Capdevila, ao que se dedica unha das prazas principais do centro histórico de Monforte, dá nome agora a un dos tres pavillóns de hospitalización do HULA. Cúmprese así un acordo adoptado pola consellería no 2010, previo á inauguración do hospital lucense, ao que chegou Sanidade en consenso con ese Concello e con asociacións veciñais da capitalidade da provincia. Os outros dous pavillóns levan o nome do médico Rafael de Vega Barreira e do practicante Faustino Vilar Ferreiro.
Repaso ás biografías
Antes do descubrimento das respectivas placas conmemorativas, Ramón Ares fixo un repaso da biografía destes profesionais do medicamento, que naceron en Lugo ou, como é do caso de Rafael de Vega , desenvolveron nesta provincia o seu labor profesional. Ares agradeceu, en todos os casos, o «compromiso, entrega e dedicación vocacional á sanidade pública» da que fixeron gala todos eles. Tamén destacou, por outra banda, o «enorme salto cualitativo» que supuxo para os usuarios do sistema público de saúde a entrada en funcionamento do HULA.
Un centro que, segundo dixo o xerente da área sanitaria, «medra co bo facer, a implicación e o traballo de grandes profesionais como foron no seu día Faustino Vilar, José Goyanes e Rafael de Vega».
Antes de pasar polo HULA, o conselleiro en funcións de Sanidade estivo no centro de saúde da Praza de Ferrol, onde fixo balance ante os medios do desenvolvemento da campaña de detección precoz do cancro de cérvix. Na provincia lucense, este programa impulsado pola Dirección Xeral de Saúde Pública funciona desde o ano 2020. O laboratorio de microbioloxía do HULA, que visitou posteriormente, é o que realiza as analíticas das mostras que se toman dentro desta campaña.
O doutor José Goyanes Capdevila figura precisamente entre os pioneiros da investigación oncolóxica en España e foi nomeado en 1917 directores do Instituto Nacional do Cancro con sede en Madrid. O médico monfortino colaborou desde esta entidade con diversas institucións dedicadas ao tratamento desa enfermidade de Francia, Inglaterra e Estados Unidos.
O descubrimento da placa co seu nome nun dos pavillóns do HULA produciuse na véspera da celebración do día mundial da prevención do cancro de pescozo uterino.