A festa, que se celebra en plena ponte de Semana Santa, cumpre 20 anos
20 mares 2024 . Actualizado ás 16:52 h.A Feira Medieval de Monforte cumpre 20 anos esta semana Santa e o Concello quere que nada falle para que a próxima edición poida lucir xa a etiqueta de Festa de Interese Galego. Por iso, a deste 2024 segue a norma dos últimos anos e ten un orzamento máis grande que a anterior. Por primeira vez roldará os 100.000 euros, e é probable que os supere. O alcalde, José Tomei, presentou este sábado a programación completa desta 20 Feira Medieval de Monforte, preparado co obxectivo de que esta convocatoria siga sendo «unha das citas de ocio mais importantes de Galicia na fin de semana de Semana Santa».
Estas son as 15 principais citas da 20 Feira Medieval de Monforte, que se celebrará o o sábado e o domingo da ponte de Semana Santa, os días 30 e 31 de marzo.
O recinto e os postos
Sábado, 30 de marzo. Apertura do mercado medieval. O recinto abre o sábado a partir das dez da mañá, pero a inauguración oficial será ás 11:30 horas, cun saúdo do alcalde, José Tomei, e unha salva de artillería coa reprodución dunha bombarda do século XIV.
O recinto da feira ocupará as rúas habituais nas últimas edicións, nas dúas beiras do río Cabe. Na marxe esquerda a feira esténdese entre a praza de Abastos, a praza Doutor Goyanes, o atrio da igrexa da Régoa e e o cubo da muralla do tramo alto da rúa Pescaderías. E na marxe dereita do río, o recinto estará entre a praza de Santo Domingo e o Campo de San Antonio. Este ano haberá máis postos de venda rueira que nunca. Serán 135, cinco máis que no 2023.
espectáculos de día
Espectáculos de cetrería. Sábado e domingo ás 13:00 e ás 17:00 horas. Será de novo no Campo de San Antonio, un recinto máis apropiado para as aves rapaces que o de antes, que estaba no atrio da Régoa, porque é máis espazosa e ten menos cables.
Talleres participativos. No campamento medieval da praza de España, a zona central do recinto, haberá tanto o sábado como o domingo exposicións de armas de época e talleres participativos sobre fabricación de cotas de malla, escritura e ilustración sobre pergamiño e oficios artesáns, entre outros. Serán o sábado e o domingo, os dous días de 11:00 a 13:30 horas e de 17:00 a 19:00.
Tiro con arco. As prácticas de tiro con arco, habitualmente una das propostas con máis demanda, terán dúas sesións o sábado e outras dúas o domingo. Os dous días co mesmo horario, de 11:30 a 14:30 horas pola mañá, e de 17:00 a 20:30 pola tarde.
Exhibicións de armas medievais. O sábado ás 12:00 horas e o domingo ás 18:00. A asociación de recreación histórica Cabaleiros de Ulver levará a cabo na praza de España unha recreación comentada de indumentaria medieval e de armas de entre os séculos X e XV.
Comida medieval. Sábado ás 14:30 horas no parador de turismo de San Vicente. É preciso reservar con antelación.
Desfile. Os cabaleiros, escudeiros e soldados que posteriormente participarán nas xustas do torneo medieval da feira desfilarán polas rúas do recinto co grupo de música medieval Turdión. O sábado será ás 16:30 horas e o domingo ás 13:30.
Xustas medievais. Serán o sábado e o domingo ás 18:00 horas. A oitava edición das Xustas Medievais de Monforte celebraranse de novo no campo de terra do colexio dos Escolapios. Haberá bancadas, pero adoitan encherse.
Concurso de traxes. Domingo ás 17:00 horas na praza de España. Concentración dos participantes no concurso de traxes medievais. Ás 19:00 horas será a entrega dos premios dese concurso e dos de decoración de balcóns, decoración de establecementos comerciais e de hostalería.
Desfile de elefantes. O dragón de lume dos últimos anos dá paso a unha das novidades da edición do 2024, o desfile de elefantes, co grupo Skalir. Serán dous, e de dimensións considerables. O primeiro será o sábado e o segundo o domingo, os dous ás 20:00 horas.
espectáculos de noite
Concerto. O grupo de música medieval Grimorium dará un concerto o sábado na praza de España. 20:30 horas.
Subida a San Vicente. Ás 21:00 horas e só o sábado. Subida a pé e con fachos desde a praza de España ata o parador de turismo de San Vicente, ao ritmo da música do grupo Grimorium e os tambores do colectivo Troula.
Espectáculo en San Vicente. Ás 21:30 horas e só o sábado. Na praza Luis de Góngora terá lugar o espectáculo «A lenda das meigas»
Solta de farois en San Vicente. Ás 22:15 horas e só o sábado. Tras o espectáculo chegará a solta de 500 farois luminosos.
Espectáculo final. O domingo ás 21:00 horas no Campo de San Antonio. O grupo Inanna representará un espectáculo de acrobacia.
A presentación do programa da edición deste ano da Feira Medieval tivo lugar na praza de abastos, en coincidencia coa primeira xornada do denominado Mercado para a Medieval. Este mercado está formado por 16 postos nos que se poden adquirir produtos e servizos apropiados para quen queiran participar activamente na Feira Medieval. Pódense comprar traxes, pero tamén complementos, artesanía, artigos de decoración, maquillaxe ou gastronomía. O mercado da praza de abastos estará aberto tamén este domingo, en horario de once a dous pola mañá e de cinco a sete pola tarde.