A renovación integral da rede de subministración precisaría dun investimento próximo aos dez millóns
22 dic 2023 . Actualizado á 10:42 h.Dos preto de 78 quilómetros da rede fornezo de auga potable xestionada por Aqualia no municipio de Monforte, case 57 corresponden a antigas tubaxes en fibrocemento. Desde xullo do 2001, cando esta empresa fíxose cargo do servizo entón baixo a denominación de Seragua, substituíronse por materiais máis modernos e resistentes ás roturas un total 20,75 quilómetros de conducións. Durante a xestión do actual goberno local foron renovados 12 dos 20 quilómetros da rede substituídos ata a data, aos que pronto haberá que sumar preto de seis da nova condución xeral de fundición que se está instalando na rúa Morín e que se estenderá ata os depósitos situados no conxunto monumental de San Vicente.
O alcalde, José Tomé, deu a coñecer os datos onte mércores, coincidindo coa súa entrega aos portavoces da oposición. No último pleno, o BNG presentara unha moción para que se realizase un estudo sobre o estado da rede de abastecemento. Tomé explicou entón que ese estudo xa existía e que sería posto ao dispor de todos os grupos, polo que os nacionalistas decidiron retirar a súa solicitude. «Dámolo a coñecer —dixo o rexedor— nun exercicio de total claridade e transparencia. Nunca tiven acceso a esa información antes de ser alcalde».
A extensión da rede de subministración que discorre por tubaxes de fibrocemento non foi o único dato que achegou na rolda de prensa, na que estivo acompañado pola primeira tenente de alcalde, Gloria Prada, e polo concelleiro de Servizos, José Luis Losada. Tomé detallou que o custo da substitución das conducións dese material roldaría os nove millóns de euros, aos que había que sumar outros 337.000 euros pola retirada do fibrocemento por unha empresa especializada. Ao conter amianto, ese tipo de residuos deben ser manipulados por un xestor autorizado.
Sen imprevistos de obra
O custo de 9.337.000 euros foi calculado, no entanto, sen ter en conta os denominados «imprevistos de obra», que con frecuencia obrigan a revisar os presupostos iniciais. A taxación realizouna Aqualia sobre a base das táboas de custos do Plan Auga 2010-2025 da Xunta de Galicia, cuxos baremos tiveron que ser actualizados á alza nun 25% pola subida de prezos na construción. Deste xeito, un metro de tubaxe de 80 milímetros que antes valía 83 euros sae agora por 103.
Tomé indicou que un investimento de 10 millóns de euros non pode ser asumida en solitario nin polo Concello nin pola empresa, e avanzou que seguirán na liña actual de renovar gradualmente a rede mediante acordos coa concesionaria e outras administracións «nos que a Xunta non quixo entrar». O alcalde agarda que esta información sirva para que non se fagan propostas sobre o problema da auga «desde o descoñecemento ou so por facelas». En particular desde partidos que, como o PP e o BNG, tiveron responsabilidades de goberno e por iso «deberían ter esta información».
«Dende que son alcalde renovouse dous veces máis que nos anteriores dezaseis anos»
Cando se complete a substitución do tramo da tubaxe xeral que está a ser renovado na rúa Morín, destacou Tomé, «teranse substituído durante a etapa de goberno deste alcalde o dobre de quilómetros de tubaxe que nos dezaseis anos anteriores». «Está é a primeira vez —afirmou na rolda de prensa— que se facilita información detallado do inventario das tubaxes desde que se asinou a contrato da auga no 2001». Naquel momento a empresa realizou un informe da situación da rede que tivo que actualizar no 2016 a pedimento dos actuais responsables municipais.
O estudo que recibiron onte os portavoces da oposición inclúe información detallada sobre a lonxitude, localización e diámetros das tubaxes de fibrocemento que discorren polas rúas do centro urbano, así como táboas nas que se detallan os custos da súa substitución.