A rúa Roberto Baamonde está cortada pola reparación
04 nov 2023 . Actualizado á 18:46 h.Unha nova avaría motivou esta fin de semana a interrupción da subministración de auga durante varias horas en Monforte. Como adoita ser habitual, o corte debeuse á deterioración dunha tubaxe da rede de distribución. A fuga foi detectada na madrugada do sábado á altura da entrada á rúa Roberto Baamonde, xusto ao lado da rotonda próxima á Compaña. O servizo permaneceu cortado durante a noite e restableceuse á primeira hora da mañá do sábado. Persoal de Aqualia, empresa adxudicataria dos servizos de auga e saneamento, seguía traballando na zona a última hora da tarde.
A gabia que tiveron que abrir os operarios de Aqualia esténdese dun extremo a outro da calzada na rúa Roberto Baamonde, que permanece pechada ao tráfico entre a rotonda, na súa confluencia co Cardeal e a Compaña, e o cruzamento coa avenida de Galicia. Os condutores que circulan nesa dirección deben desviarse por Francisco Moure e a rúa Sarria. No outro sentido da circulación, a alternativa é a rúa Conde.
A subministración volveu á normalidade paulatinamente nas rúas afectadas a partir das oito da mañá do sábado, aínda que nalgúns puntos o servizo non se restableceu ata pasadas as nove. O Concello non emitiu comunicado ningún sobre veríaa nin informou dela a través da web municipal
Augas fecais en Piñeira
Coincidindo con esta última avaría, por outra banda, o grupo municipal do PP fixo público un comunicado no que acusa o alcalde, José Tomé, da «mirar cara a outro lado» a hora de solucionar os problemas no saneamento e o abastecemento de auga. Os populares, con todo, non se fan eco na rotura da rúa Roberto Baamonde. Na súa nota de prensa fan alusión á fuga dun colector de augas fecais en Piñeira, na confluencia do paseo fluvial coa ponte sobre o Cabe, e á falta depresión na subministración de auga que sofren desde hai tempo os veciños do Morín, no barrio da Estación.