Media de entre 80 e 120 reservas diarias no arranque dos buses lanzadeira na Ribeira Sacra
LEMOS
Os cinco traxectos que ofrece este ano o consorcio de turismo para desconxestionar os puntos máis visitados manteranse ata agosto
16 jul 2023 . Actualizado ás 10:33 h.Os servizos de microbuses lanzadeira gratuítos para levar visitantes aos lugares da Ribeira Sacra de maior demanda turística entraron en funcionamento este sábado e teñen unha media de entre 80 e 120 reservas nos seus primeiros días de funcionamento. O dato foi facilitado na xornada inaugural polo consorcio de turismo , que impulsa a iniciativa dentro do Plan de Acción do Plan de Mobilidade Sostible. Esta proposta busca evitar «os habituais problemas de estacionamento en embarcadoiros, mosteiros ou áreas de ocio con elevada afluencia de visitantes».
O consorcio de turismo puxo en marcha no 2021 un primeiro microbús para desprazar visitantes ao mosteiro ourensán de Santa Cristina. No pasado verán este servizo ampliouse á praia fluvial da Cova, no municipio de Saviñao. Este verán tamén funcionarán ata o 30 de agosto percorridos de ida e volta en diferentes horarios aos embarcadoiros dos catamaráns de Ponche do Sil e Belesar, e ao mosteiro de Santo Estevo de Ribas do Sil. As saídas son, segundo os casos, desde Monforte, Escairón e Castro Caldelas.
Os microbuses teñen entre 16 e 30 prazas, en función das rutas, e hai que reservar praza salvo na que enlaza co mosteiro de Santo Estevo. A previsión de maior demanda, segundo o consorcio, apunta ao mes de agosto.