O Atlético Escairón continúa o seu camiño cara ao grupo norte da Preferente Autonómica. O conxunto que prepara Javier Montoto cumpriu o trámite e impúxose ao pechacancelas do grupo lucense da Primeira Autonómica por 1-0. A pesar da diferenza de puntos na táboa clasificatoria non foi sinxelo para os locais imporse a un Antas que se defendeu ben.
Este triunfo permitiu ao Escairón sumar tres puntos máis para consolidarse como líder da categoría. Suma 65 puntos, tres máis que o segundo clasificado, o Castro, que cotiza á alza, e que vén de superar ao San Ciprián por 1-3.
A SD Chantada tamén cumpriu. Os discípulos de Traste derrotaron con claridade ao Pastoricense, penúltimo clasificado, por 6-1. Esta vitoria consolida ao conxunto de Ou Sangoñedo na terceira praza. Acumula un total de 60 puntos. O principal obxectivo dos chantadinos é asegurar os postos de play off de ascenso.
O Chantada Atlético arrincou un punto na súa visita ao campo do Foz, que lle serve para seguir aspirando ao play off. Actualmente, os discípulos de Fernando Corredoira son sextos con 51 puntos.
A xornada número 28 completouna o Taboada, que se enfrontou á Pontenova. Os xogadores de Manu Rodríguez caeron derrotados pola mínimo (4-3). No entanto, o cadro da Medela ten practicamente selada a súa permanencia na Primeira Autonómica.
Copa Deputación
Este xoves dispútase a primeira xornada da Copa Deputación de equipos de Preferente e Primeira Autonómica, aínda que só xogarán estes últimos. Os partidos previstos son os seguintes: Xove Lago-Chantada At (17.00 horas) e Atlético Escairón-Taboada. (16.30 horas).