![](https://img.lavdg.com/sc/UOJG7g58T501RzPnnzs8GCF8q7U=/480x/2022/05/11/00121652295482909743407/Foto/MY12C4F1_205732.jpg)
O soberino debutou coa selección galega e aspira ao ascenso co Pavillón
12 may 2022 . Actualizado á 05:00 h.O futbolista soberino do Pavillón, Pablo Pérez Freire, cumpriu un dos seus soños: competir coa selección galega. E fíxoo co combinado sub-14. Tres partidos de preparación e un adestramento foron suficientes para que os seleccionadores galegos convocáseno para disputar a primeira fase do campionato de España.
Estivo en Asturias co combinado autonómico, e tivo o seu protagonismo. «Foi o máximo que me puido pasar. Unha experiencia inesquecible, que agardo repetir na fase final», sinala Pablo Pérez.
Galicia deu a talla en terras asturianas. É verdade que perdeu cos anfitrións, pero superou a Melilla, o que fixo que se clasificase para a seguinte fase como un dos segundos mellores equipos. Ao futbolista, natural de Vilaescura, non lle pesou a presión. «Canto máis sexa o nivel de esixencia máis me motivo e divírtome», engade Pérez.
Aos seis anos comenzo a súa andaina no fútbol este prometedor central. Tras pelotear cos seus amigos e en ocasións sós por Vilaescura e xogar pachangas en Monforte, a mozo promesa pediulle á súa nai que o inscribise no Calasancio. Fíxoo e incorporouse ao club estudantil, no que se forxou como futbolista. «Foron seis tempadas bonitas e inesquecibles», di.
As súas actuacións non pasaron desapercibidas para os clubs ourensáns, que lle botaron no ollo. E foi hai dous anos cando o Pavillón chamou á súa porta. Pablo non llo pensou, e máis despois de que se confirmase que o Calasancio estaba abocado a competir na liga provincial. «Tomei a decisión correcta, porque xogar no Pavillón era facelo en categoría superior, co que iso supuña para a miña progresión», asegura.
E si, estas dúas tempadas supuxeron o seu auténtico bautismo de lume. «Crecín moito como futbolista e madurado como persoa. Estou nunha categoría competitiva e de alto nivel de esixencia. De verdade, estou a aprender moito», apunta.
Futbolista con talento
Pablo Pérez é un central con talento e cunha gran proxección. Destaca pola súa saída de balón, por ser expeditivo e polo seu liderado. Ademais tamén se pode prodigar como mediocentro, pero recoñece que está máis cómodo no centro da defensa.
Esta fin de semana pode cumprir outro soño: ascender co Pavillón á División de Honra. Conseguirá o obxectivo se a escuadra ourensá dobrega ao Porteiro 2.000. «Queremos ascender, e o sábado darémolo todo por conseguir dar o salto de categoría, e máis porque é ante a nosa afección», puntualiza.
Iso si, aínda que o seu equipo ascenda, o futbolista soberino non poderá gozar da División de Honra, xa que a próxima campaña xa subirá á categoría cadete. O fútbol é a auténtica paixón dun Pablo que ten como ídolo ao exbarcelonista Carles Puyol. «É o meu auténtico espello. Gustábame moito», di.
O soberino ten máis soños e obxectivos. «Gustaríame ser profesional do fútbol, xogar en Primeira División e ser internacional con España. Son soños, pero hai que ter ilusión por traballar para chegar», conclúe.
No Pavillón comparte vestiario cos tamén monfortinos Álex e Gael.