A empresa perde a demanda contra o acordo que a obrigaba a investir pactar no contrato
19 feb 2022 . Actualizado á 18:10 h.O Xulgado do Contencioso Administrativo número 1 de Lugo desestimou o recurso interposto pola empresa Aqualia, adxudicataria dos servizos de auga e saneamento en Monforte, contra o acordo municipal a través do que lle foi requirido o pago de 2.221.980 euros polos investimentos comprometidos no contrato nos anos inmediatos á súa firma que non chegaron a executarse. O gabinete de prensa da alcaldía deu a coñecer este sábado o contido da sentenza, que obriga á empresa para abonar algo máis de 1.671.000 euros, xunto cos intereses de demora correspondentes, en concepto da débeda que se lle reclama polas obras que se comprometeu a realizar no 2001.
«Novamente a xustiza danos a razón, e xa son varias sentencias favorables fronte a Aqualia», destaca o alcalde, José Tomé. Aínda que Tomé carga as tintas na «enorme importancia» desta cantidade para custear novas actuacións municipais, o fallo será recorrido polo Concello. O goberno local non renuncia a que a empresa pague a totalidade do diñeiro que entende que non se chegou a investir.
O acordo contra o que interpuxo o contencioso Aqualia foi adoptado polo pleno en febreiro do 2020. A corporación decidiu entón requirir á concesionaria o pago de 2.221.980 euros polas obrigacións contractuais incumpridas durante os anos 2001 e 2002. Nesa etapa debería executarse unha serie de investimentos que ofrecera a empresa tras facerse cargo da concesión dos servizos de auga e saneamento.
Aqualia recorreu nun primeiro momento a decisión do pleno pola vía administrativa e, ao ser denegada a súa reclamación, optou por levar o asunto aos tribunais. A sentenza do Xulgado do Contencioso Administrativo número 1 de Lugo admite como investimentos realizados o desembolso de 734.276 euros en obras, polo que a débeda real ascendería á cantidade de 1.671.671 euros que deberá abonar inicialmente Aqualia.
Sen renunciar ao total
Unha vez recibida polo Concello, explica o alcalde, a compensación económica da empresa adxudicataria dos servizos de auga e saneamento «permitirá levar a cabo importantes investimentos en infraestruturas e actuacións de mellora para o municipio». O equipo de goberno non descarta que os tribunais ratifiquen finalmente o pago da totalidade da débeda que reclama o Concello á empresa. «Imos recorrer esta sentencia porque cremos que a cantidade que se reclamou a través do acordo tomado polo pleno é a que debe ser abonada por Aqualia», di Tomé.
Consultado respecto diso, o gabinete de prensa da alcaldía precisou que o pago dos 1,6 millóns que recolle a sentenza Xulgado do Contencioso Administrativo número 1 de Lugo non se vería alterado no suposto dun fallo desfavorable ao recurso municipal. «Ou se confirma esa cantidade ou aumenta, pero non baixa», puntualizaron esas mesmas fontes.
Melloras na potabilizadora e os depósitos, fontes e un parque acuático
O Concello de Monforte e a empresa FCC Aqualia —por aquel entón Seragua— formalizaron en xuño do 2001 o contrato concesión do servizo de abastecemento de auga. Esta empresa foi a que obtivo maior puntuación no concurso nas melloras ofertadas, incluídas nun plan de investimentos que recollía a execución de obras por un importe total de 2.405.947 euros. Segundo detalla o Concello, entre estes investimentos —que debían empezar a concretarse aos tres meses— figuraban «un estudo de melloras para a adecuación técnica da potabilizadora de Ribas Altas, a mellora nos depósitos de San Vicente, e a execución de fontes cibernéticas modulares e dun parque acuático en Monforte».
Desas actuacións, Aqualia realizou parcialmente «a obra referente ao estudo de melloras para adecuación técnica da ETAP de Ribas Altas, investindo 40.784 euros dos 378.803,49 ofertados». Polo que respecta ao parque acuático, e sempre segundo a información municipal, «achegou 143.182,29 euros para a adquisición dos terreos, habendo ofertado un total 1.594.236 euros para este proxecto».
Non caducaron
Aqualia sostiña no recurso contencioso-administrativo que a reclamación económica municipal carecía de validez porque o expediente de referencia para reclamar os investimentos caducara. O Xulgado do Contencioso Administrativo número 1 de Lugo conclúe que o argumento esgrimido pola empresa está fóra de lugar e que a reclamación non é un problema puntual senón que afecta á execución do contrato.