Monforte retoma o premio ao barrio máis coidado que non se deu en 17 anos

O «bonitismo» ía ter recompensa en Monforte moito antes de que ese termo comezase a empregarse en contraposición ao feísmo urbanístico. A ordenanza municipal de fachadas, elementos construtivos e soares que entrou en vigor no 2005, e que acaba de ser actualizada, incluía no seu artigo 12 a concesión dun premio anual por importe de 6.000 euros como estímulo «á rúa que máis se distinga polo seu adecentamento, ornato e embelecemento». Dezaseis anos despois, mantense en vigor sen que teña chegado nin sequera a convocarse.

A normativa aprobada no 2005 establecía que o importe económico do premio debería investirse na rúa gañadora e que as condicións relativas á súa concesión desenvolveríanse a través dun regulamento do que nada máis se soubo. Por falta de potenciais candidatos ou por non xerar agravios que puidesen pasar factura electoral, o certo é que o anterior equipo de goberno preferiu non mover ficha en canto ao concurso.

O pleno aprobou recentemente unha nova ordenanza que incorpora sen modificar unha coma todo o relativo ao premio á rúa de Monforte que se distinga polo amaño das fachadas ou o peche dos soares. Convocarase por fin o premio? «Convocarase si se dan as circunstancias», sinalan desde o actual equipo de goberno. Unha desas circunstancias sería «que se dese un embelecemento previo» nalgún barrio de Monforte que dese pé a desempoar ese galardón.

Un paso aínda pendente

Os responsables municipais consideran, en todo caso, que é prematuro pór data á convocatoria do premio cando a ordenanza está pendente aínda de entrar en vigor. O visto e prace inicial produciuse a finais de outubro e o texto permaneceu a exposición publica para a presentación de alegacións ata o pasado 5 de decembro. A aprobación definitiva, tempa embargo, non se incluíu na orde do día do último pleno do ano, que terá lugar o vindeiro luns.

A inclusión do premio á rúa máis preocupada polo coidado da súa estética produciuse pouco despois de que o Concello encargase á arquitecta Teresa Táboas o estudo cromático que serviu de referencia para o pintado de fachadas nas marxes urbanas do Cabe. Algúns propietarios sentíronse agraviados pola autorización en determinadas zonas de cores que a eles non se lle permitiu empregar. Ese contexto contribuíu ao «arrefriado» dos plans que se barallaban entón para combater o feísmo.

«Incentivar a que se coide o colectivo paréceme moi ben, pena que se teña que facer con premios», apunta o arquitecto monfortino Xosé Lois López Otero, responsable da oficina de urbanismo de Folgoso do Courel. No acto no que se fixo pública a aprobación do seu plan de ordenación, ao que asistiu o presidente da Xunta, López Otero definiu ese municipio como «un dos mellor conservados de Galicia». E o é, subliña, «grazas á xente do rural que soubo coidalo, e non ás normativas que se redactan nos despachos das cidades».

Monforte, desde o seu punto de vista, conserva en moitas das súas rúas diferentes tipoloxías arquitectónicas de interese que falan da súa evolución histórica e socioeconómica. Os corredores típicos das zonas urbanas de maior vocación agraria —Abeledos, Ramberde, Carude— poden adquirir hoxe un valor engadido. «Quen non os mirou con envexa cando a pandemia nos obrigou a estar medidos nas casas?», apunta o arquitecto.

Diferentes zonas urbanas melloraron a súa estética nos últimos anos con rehabilitacións que respectan a tipoloxía tradicional das vivendas. Un caso significativo é o da Falagueira, no conxunto monumental de San Vicente, que recibiu no seu día un premio municipal á rúa máis limpa. O concurso foi convocado cando a actual concesionaria da recollida de lixo fíxose co contrato e a entrega da distinción foi festexada polos veciños coa celebración dunha verbena.

---

---

---