O xogador monfortino cumpriu a súa segunda campaña no club olívico e o bordó co infantil A
30 jun 2021 . Actualizado ás 05:00 h.Brais Dalama o bordó. O futbolista monfortino proclamouse campión galego co Real Club Celta , entidade na que cumpriu a súa segunda tempada. E fíxoo co infantil A, no que foi un dos xogadores máis destacados. De feito, tivo continuidade durante toda a campaña.
Con tan só 13 anos, o monfortino cumpriu as expectativas que os responsables da canteira celeste tiñan sobre el. Dalama contribuíu de xeito decisivo á consecución dun campionato0 que tivo como colofón o triunfo do Celta sobre o Deportivo. «Estou moi contento de como foi a tempada, porque gañamos a liga, e a nivel individual as cousas saíronme moi ben», indica Dalama, que xa goza das súas vacacións en Monforte.
Para Brais esta foi unha tempada importante, porque aínda que o ano pasado desprazábase desde Monforte a adestrar aos campos da Madroa, esta tanto os seus pais como o club optaron porque xa quedase na residencia que o Celta ten no centro de Vigo. «Adapteime perfectamente, e iso influíu de xeito decisivo na miña progresión tanto como futbolista como persoa», afirma Dalama, que superou con solvencia 2º ESO no colexio Os Salgueiros.
O xogador, que se formou no Calasancio, atesoura talento. Destaca pola súa técnica, a súa rapidez, e recoñece que o máximo para el son as asistencias. A polivalencia é unha das súas características principais. A súa posición natural é a de interior -ben pode xogar pola dereita ou pola esquerda-, aínda que tamén se prodiga como mediocentro. «A posición na que máis cómodo me sinto é a de interior esquerdo, porque me gusta regatear e buscar portería», asegura.
O seu futuro
Este ano competiu co infantil A e a próxima tempada farao co cadete B, co que xa realizou varias sesións preparatorias no presente curso. Brais Dalama demostra a súa madurez en cada unha das afirmacións que fai. A pesar da súa curta idade, o exfutbolista do Calasancio xa pensa no futuro. «O meu principal obxectivo é chegar ao primeiro equipo do Celta e poder debutar coa selección española en calquera categoría. Confío nas miñas posibilidades, e se que hai que traballar moito para conseguir esta meta», apunta o monfortino.
Aínda que o seu desexo é dar o salto algún día ao fútbol profesional, Brais Dalama non esquece os estudos. «A vida do futbolista só dura uns anos, polo que hai que pensar no futuro. Gustaríame ser nutricionista ou fisioterapeuta», comenta Dalama, ao que a materia que máis lle gusta é Educación Física.
Na Madroa, o ano pasado cruzábase con futbolistas do primeiro equipo, o que lle facía ilusión. De feito, ten dúas importantes referencias. «Gústanme moito Denis Suárez e Brais Méndez», afirma.
Este ano non coinciden, xa que o primeiro equipo adestrou en Mos.
A nova promesa monfortina estampou a súa firma cos vigueses en xullo do 2019
Brais Dalama fichou polo Real Club Celta en xullo do 2019. Entón, a nova perla da canteira monfortina tiña sobre a súa mesa dúas ofertas: a do Celta e a do Deportivo. Os dous clubs apostaban seriamente por Dalama, conscientes de que a nova promesa pode estar chamada a marcar unha época no fútbol galego.
A Brais tocáballe decidir, e inclinouse polo club olívico. E fíxoo, segundo as súas palabras naquel momento, porque o Celta presentoulle un proxecto ambicioso, co que se sentía plenamente identificado. Outro factor que pesou na súa decisión final foi o feito de que o seu novo club lle permitía seguir vivindo a primeira tempada en Monforte, algo que consideraba esencial para os seus intereses.
Esa decisión colleu por sorpresa aos seus pais, que pensaban que daría o si quero ao Deportivo. Pero non dubidaron en apoiar ao seu fillo na súa decisión, porque o que priorizaban era a felicidade de Brais. O xogador era unha das novas promesas que máis destacaba na canteira do Calasancio. A súa fichaxe polo Celta axudoulle a evolucionar e a progresar. A elite agárdao.