O Festival 17° Ribeira Sacra podería saír adiante cun formato máis reducido

A organización do Festival 17° Ribeira Sacra despexará en breve as incógnitas relativas á súa celebración durante este verán. «En resposta a moitas das consultas que nos estades facendo sobre a edición deste ano, queremos informarvos que seguimos a evolución da alerta sanitaria con atención, para poder tomar unha decisión nas próximas semanas», aclara a través da súa conta de Twitter. «Somos conscientes -engade- da complexidade de organizar eventos neste 2020, e nosa principal preocupación antes de nada é a vosa seguridade e a de todos os profesionais que traballan no festival».

A estas alturas, os organizadores non descartan que a edición deste ano poida ter lugar. A favor desa posibilidade xoga, segundo indican, «a particularidade deste festival con capacidades reducidas e en plena natureza». Aínda que manteñen «certo optimismo» sobre a súa celebración, dan por feito que non poderá ser «o mesmo festival que empezamos a crear no mes de setembro».

«O noso compromiso co territorio e a contribución que este evento fai ao seu desenvolvemento turístico e económico, obrígannos a valorar, xunto coas institucións e marcas que nos acompañan, todos os posibles escenarios antes de tomar unha decisión final», sinalan.

Reintegro de abonos

A organización tamén recibiu consultas sobre o reintegro dos abonos a persoas que debido á actual situación descartan xa a posibilidade de asistir este ano ao festival. As devolucións, segundo avanza, poderanse tramitar desde este venres a través da canle de compra.

«Estamos a traballar para celebrar unha edición moi especial, nun formato máis reducido e con menos capacidade do habitual, polo que vos recomendamos manter o voso abono se tedes pensado asistir», explica a organización. De non poder celebrarse esta cuarta edición, procederase de forma inmediata ao reembolso dos abonos.

---

---

---