A principios de agosto graváronse na vila de Seceda as primeiras imaxes de vídeo dun oso pardo tomadas na serra do Courel, que confirman de xeito indubidable a presenza esporádica desta especie na zona. A gravación realizouse en plena noite coa técnica de fototrampeo nun colmenar que sufrira diversas desfeitas nas semanas precedentes. As imaxes mostran como un exemplar xuvenil de 1,20 metros de altura e entre sesenta e setenta quilos de peso achégase a unha colmea, ponse en pé e derrúbaa coas patas dianteiras.
A filmación foi realizada grazas á colaboración entre o biólogo Pedro Alonso e un grupo de apicultores de Seceda e apenas ten precedentes en Galicia. Con anterioridade só se puido gravar un vídeo de moi curta duración no que se ve como un oso inténtase achegar a un colmenar do Robledo da Lastra -no municipio de Rubiá. en Ourense- e é repelido por un pastor eléctrico. Esta gravación foi efectuada na primavera do 2006 por técnicos da Fundación Oso Pardo.
Parentesco fósil
Doutra banda, os científicos do Instituto Universitario de Xeoloxía da Coruña seguiron desenvolvendo durante o 2014 unha investigación con fósiles do extinto oso cavernario (Ursus spelaeus) descubertos no xacemento de Cova Eirós que suxire a existencia dun vínculo xenético entre estes exemplares e outros que se localizaron na soada cova de Chauvet -en Francia-, onde se conserva tamén un dos conxuntos de arte rupestre máis antigos do mundo. Os plantígrados de Cova Eirós teñen unha antigüidade de entre 28.000 e 31.000 anos e presentan unha maior proximidade xenética cos que viviron nesa mesma época na caverna francesa que con outros de períodos anteriores que foron atopados en diversas covas do Cebreiro e O Courel.
A investigación segue en curso e agarda que poidan proporcionar novos datos acerca das movementos migratorios das poboacións de osos prehistóricos entre o norte da Península Ibérica e outras zonas de Europa. Os investigadores deste instituto, así mesmo, continúan traballando nun proxecto que ten por obxectivo obter secuenciaciones xenéticas dos restos humanos máis antigos coñecidos ata o de agora en Galicia, localizados na gruta de Valdavara -en Becerreá- e na Cova do Uro, na serra do Courel. Os resultados poderían darse a coñecer nos próximos meses.