O adestrador sarrián do Calasancio, David Páez, xa dispón do título de Director Deportivo. Este luns o máximo responsable da entidade estudantil finalizou en Madrid o curso co que recibiu formación nas parcelas financeira, xurídica, institucional, de comunicación, tecnoloxías aplicadas e mercadotecnia.
Ningúns dos relatores que impartiron estas xornadas durante os últimos catro meses son, entre outros, Pablo Alfaro, José María Amorrortu, Monchi, Albert Valentín ou Felipe Miñambres.
David Páez mostrou a súa satisfacción por ter xa no seu poder esta titulación. «Estou moi contento de dar un paso máis na miña carreira. Antes de exercer calquera profesión hai que ter unha formación previa, polo que temos que prepararnos», sinala David Páez.
Amplo abano de opcións
Estar en posesión do título oficial de director deportivo abre novos e amplos camiños no mundo do fútbol profesional. «Para min foi unha grande aprendizaxe, porque na programación do curso houbo un amplo abano de contidos e coñecementos no tocante a esta figura no ámbito profesional», indica.
O preparador estudantil admite que, a pesar do sacrificio que implica poder adquirir esta formación, hai que dar o paso. «Este título supón un grande esforzo, porque hai que viaxar moito, pero por amor ao fútbol intentei conseguilo», indica un David Páez, que no seu momento foi o adestrador máis mozo da súa promoción en conseguir o título nacional.
Nestes últimos catro meses, o mozo preparador sarrián tivo a oportunidade de compartir pupitre con deportistas da talla o barcelonista Carles Puyol. Páez destacou o grande ambiente que houbo. «Son xente sinxela e humilde, cos que tiven moita e unha boa comunicación. Levo un grato recordo do grupo co que estiven», apunta o técnico.
David Páez tivo a oportunidade de departir todos os luns co exxogador azulgrana, ao que ve pronto exercendo na entidade que preside Josep María Bartomeu. «A Carles Puyol véxoo como futuro Director Deportivo do FC Barcelona. É unha persoa e un profesional moi válido, que destaca tanto pola súa faceta deportiva como polos seus valores persoais», conclúe David Páez.