Os principais líderes opositores venezolanos néganse a recorrer a súa inhabilitación no Supremo
INTERNACIONAL
O mecanismo de recorrer ante o alto tribunal estaba incluído nos acordos de Barbados, que quedaron no aire tras as novas ordes de detención contra os contrarios ao réxime e o cuestionado resultado do referendo sobre a anexión do Esequibo
16 dic 2023 . Actualizado ás 05:00 h.O prazo de quince días dado polo Tribunal Supremo de Xustiza para recorrer as inhabilitacións que impiden a dirixentes opositores concorrer a cargo público finalizou onte coa presentación de só dous recursos de revisión, os interpostos por Daniel Ceballos e Leocenis García, con apoios moi minoritarios e moi próximos ao chavismo.
A líder da oposición, María Corina Machado, evitou presentarse no tribunal despois de que o Goberno de Nicolás Maduro ditase orde de detención contra catro dos seus colaboradores, entre eles Roberto Abdul, presidente da asociación civil Sumar e un dos principais expertos electorais do país, que foi detido pola policía política a semana pasada. Tampouco o fixo Henrique Capriles, a pesar de que nun principio invitara a todos os políticos inhabilitados a acudir ao Supremo, tribunal que non falla contra o réxime desde hai 21 anos.
Machado declarou que non se considera inhabilitada, xa que non hai ningún documento que así o acredite (nunha decisión que algúns analistas consideran errada). Mentres, Capriles sinalou que a súa inhabilitación política xa foi recorrida ante o propio Supremo.
O mecanismo de recorrer ante o alto tribunal estaba incluído nos acordos de Barbados, que quedaron no aire tras as novas ordes de detención contra opositores e o cuestionado resultado do referendo sobre a anexión do Esequibo.
A reunión do xoves na illa San Vicente entre Maduro e o presidente de Güiana , Irfaan Alí, finalizou cun pacto de non agresión na súa disputa polo territorio rico en petróleo . «Güiana e Venezuela non se ameazarán nin utilizarán a forza mutuamente en ningunha circunstancia», sinala o documento subscrito. Ademais acordouse celebrar nos próximos meses unha reunión con intermediación do Brasil, San Vicente e a ONU para desescalar as tensións bilaterais.