Australia alerta a habitantes do noroeste de Victoria de que deixen os seus fogares ou quedarán atrapados polos incendios
INTERNACIONAL
As condicións climáticas seguen sendo extremas, con temperaturas que esta fin de semana superarán os 40 graos
10 ene 2020 . Actualizado ás 09:31 h.O Goberno de Australia alertou este venres aos residentes das grandes áreas do noroeste de Victoria , declarado en «estado de desastre», por primeira vez na súa historia, de que abandonen os seus fogares ou correrán o risco de quedar atrapados polos incendios forestais que arrasan esta zona desde Nadal, segundo informa Europa Press.
Australia prepárase para o enésimo día de incendios baixo condicións climáticas «extremas», con previsións para a fin de semana que superarán os 40 graos centígrados e ventos de ata 90 quilómetros por hora en moitas áreas rurais, situacións que levan dificultando a extinción dun lume que xa devorou uns 10 millóns de hectáreas en todo o país.
O primeiro ministro de Australia, Scott Morrison, alertou este venres, segundo recolle EP, de que será «un día difícil para os estados do leste» e de que aínda está «moi lonxe o final desta crise».
Morrison, moi criticado polo seu labor durante os incendios, explicou que os barcos permanecerán fronte ás costas de Nova Gales do Sur, preparados no caso de que teñan que evacuar aos habitantes das distintas poboacións do estado.
O primeiro ministro conservador tamén confirmou que tanto a Marina como o Exército continuarán colaborando no intento de extinción dos 134 incendios que continúan aínda activos en Nova Gales do Sur, 53 deles sen conter, informa EP.
Mentres tanto, en Australia do Sur, máis de 200 bombeiros seguen loitando para conter un incendio fóra de control que queimou xa máis dun terzo da Illa Canguro.
Os incendios provocaron xa polo menos 24 vítimas mortais e catro bombeiros máis resultaron feridos nos máis de 200 incendios dos estados australianos de Nova Gales do Sur e Victoria , que arrasaron xa tres millóns de hectáreas no último mes.
Ademais, polo menos seis presentas seguen desaparecidas en Victoria , onde hai polo menos 50 incendios en curso. En Nova Gales do Sur, as autoridades están a intentar despexar unha área de 14.000 quilómetros, con cinco «zonas prohibidas», informa EP.