![](https://img.lavdg.com/sc/GHdCvqpuFL3wyxeDLwOtU_BEBfs=/480x/2018/02/12/00121518430980969344818/Foto/reu_20180111_222630900.jpg)
O futbolista do Barça é unha persoa atípica para o común do fútbol, coñecemos o lado máis persoal do croata
12 feb 2018 . Actualizado á 13:31 h.Ivan Rakitic pisou España por primeira vez para fichar polo Sevilla. O seu contrato co equipo hispalense non só lle trouxo á mellor liga do mundo, senón que lle serviu para atopar o seu sitio no mundo. Namorouse da cidade andaluza, da súa comida, das súas tradicións, do seu acento e incluso atopou á muller da súa vida. Onda Raquel Mauri, a súa muller, Ivan Rakitic formou o que para el «é o máis importante da miña vida»: a súa familia.
O mediocentro do FC. Barcelona é internacional coa selección croata e conseguiu entrar no club dos centenarios. Rakitic conseguiu a cifra dos 100 goles na súa carreira e non só iso, tamén conseguiu consagrarse como asistente da liga, con 106 asistencias na súa carreira.
1. O debate de Rakitic entre Croacia e Suíza
Ivan Rakitic naceu en Möhlin (Suíza) en 1988, fillo dun croata e unha serbia. Unha das decisións máis importantes que tivo que tomar na súa vida foi a de elixir con que selección quería xogar. Disputou algún partido con Suíza, pero deuse conta de que o seu verdadeiro lugar estaba con Croacia.
2. O idioma non foi un problema para conquistar á súa muller
Coñeceu á súa muller, Raquel Mauri, no hotel onde viviu durante tres meses antes de atopar unha casa en Sevilla e fichar polo conxunto hispalense. Ela era camareira no hotel e el acudía sempre á cafetería para pedir «un café e unha fanta laranxa», as únicas dúas cousas que sabía dicir en español. A pesar da súa insistencia, ela sempre rexeitou todas as súas invitacións ata que por fin, e tras abandonar o hotel, concedeulle unha cita. Rakitic e Raquel levan xuntos seis anos e teñen dúas fillas en común, Althea e Adara.
3. O seu español con acento andaluz
Cando chegou a Sevilla, Rakitic non tiña nin idea de español, pero conseguiu facerse co cariño da afección sevillista grazas ao español con acento andaluz que adquiriu.
4. Amante da Semana Santa
O xogador nunca sae de festa, pero é un fan declarado da Semana Santa e a Feira de Sevilla. En honra ao ambiente da cidade abriu un bar restaurante ao que chamou «Dinain Tapas & Copas». O local funcionaba de marabilla, pero a súa proximidade co Benito Villamaría provocou o asedio dos radicais do Betis e non lle quedou máis remedio que pechalo.
5. Estudou Arquitectura
Antes de dedicarse ao fútbol de elite, empezou a cursar arquitectura. Só puido dedicarlle 7 meses, pero non descarta retomalo cando colgue as botas.
6. Soñaba ser como el...
De pequeno quería ser como Prosinecki, o seu grande ídolo futbolístico.
![](https://img.lavdg.com/sc/gQpwVVIz1iVqYJ0MoCOZVrq8tG4=/480x/2018/02/12/00121518432061689520747/Foto/SPO021G05.jpg)
7. O gran susto da súa vida
O gran susto na vida de Rakitic foi o pasado 17 de agosto durante o atentado cometido nAs Ramblas de Barcelona. O futbolista declarou que estaba preparado, onda a súa familia, para dar un paseo polo lugar onde se cometeu o accidente. A súa muller cambiou a última hora de plans e finalmente quedaron na súa casa. «Estivemos a tres minutos de ir alí», recoñeceu Rakitic.
8. Apaixonado da cociña
É un apaixonado da cociña «tanto especialidades croatas como españolas», aínda que recoñece que o seu prato favorito é o salmorejo.
9. O adestrador ao que máis admira
O adestrador co que máis confianza tivo foi Luis Enrique, do que chegou a dicir que «se tivese que tirarme dunha ponte polo míster, faríao sen dubidalo».
10. A súa faceta máis solidaria
Gústalle aproveitar o seu tempo para desenvolver tamén a súa faceta máis solidaria. Desde o 2016 colabora cunha asociación croata destinada a recoller fondos para axudar a persoas cegas e con discapacidades visuais nunha campaña chamada «Ver co teu corazón».