«Enerxía, ganas e ilusión», receitas dAs Celtas para a súa estrea en Segunda Federación

O conselleiro do Celta Sergio Álvarez, o membro do consello que seguirá máis de preto ás Celtas tras a marcha de Xisela Aranda, comentou cos medios do club como afronta o cadro celeste unha nova tempada na que, tras o ascenso, estréanse en Segunda Federación. Sinala que o equipo está «con enerxía, ganas e ilusión para competir na nova categoría, con todo o que iso supón» e lembrando que lograron ese obxectivo no primeiro ano de vida do proxecto.

Considera o de Catoira que os reforzos viñeron moi ben ao equipo de Vicky Vázquez para que «dar o salto de calidade» requiría competir un banzo máis arriba. «Tiveron un período para adaptarse, estar coas súas compañeiras, coñecer o propio entorno, a cidade, todo o que implica xogar nas Celtas», sinala Álvarez, que considera que formar parte deste equipo «é unha gran responsabilidade e un desexo de calquera futbolista neste momento».

Asume que «a esixencia vai ser maior», valorando o grupo como «complicado». «Pero, como dicía, creo que se están facendo as cousas ben, As Celtas levan unha boa pretempada, as sensacións son moi boas», polo que cre que, unha vez que se adapten á categoría, estarán en condicións de «competir conta calquera, están preparadas». O primeiro partido, ante o Bizkerre este sábado na Madroa (16.00), agardan «complicado» e sabe que os nervios serán maiores, sobre todo para as debutantes, pero incide en que «por que non conseguir a primeira vitoria da tempada».

O conselleiro destaca a repercusión que tivo a creación do equipo e agradece o apoio do celtismo a tempada pasada. «Notámolo, sentímolo e nos momento complicados, tamén axudou moito. É tamén unha responsabilidade de seguir facendo as cousas ben, crecendo como equipo e que a xente se siga enganchando e veña apoiar, que os necesitaremos e van ser importantes para comezar ben», engade. Tamén anima a facerse o Carné Celtista para ratificar ese apoio.

---

---

---