Os vigueses, curtos de preparación, con varios experimentos e sen apenas presenza en ataque, caen no primeiro ensaio do verán ante o Famalicão
15 jul 2025 . Actualizado á 21:20 h.O Celta estreou a pretemporada con derrota ante o sétimo da liga lusa. O Famalicão, cunha marcha máis no físico, aproveitou dous dos seus tres disparos entre paus para anotar dous goles e levarse o triunfo da CIdade Deportiva Afouteza ante un conxunto vigués demasiado espido na fronte de ataque: 0-2. Dous tiros a porta, ningún deles certeiro, foi todo o rédito dun conxunto vigués errático co balón.
A primeira proba ante o Famalicão serviu para confirmar dúas evidencias: que o 3-4-3 seguirá sendo o sistema matriz de Claudio Giráldez e que todo o diferente seguirá saíndo das botas de Iago Aspas. Ver, e sobre todo, escoitar, ao capitán no primeiro amigable da pretemporada foi unha delicia. Porque o pouco fútbol que o Celta ensinou na primeira metade saíu das súas botas e porque xogar o partido sen público serviu para percibir como o moañés radiaba o partido dentro do campo e daba ordes, moitas delas en inglés, a Jones.
O noruegués con pasaporte marroquí, fichado en decembro, xogou os seus primeiros minutos co primeiro equipo e fíxoo como carrilero dereito, demostrando velocidade e erros defensivos a partes iguais. Jones foi un dos debutantes nos célticos, outro foi Radu na portería. O romanés sacou unha boa man nun disparo pegado ao pau, pero nada puido facer no gol do Famaliçao, que cunha marcha máis controlou o partido, entrou con facilidade pola súa banda dereita e tras un par de aviso adiantouse no marcador cando Simón Elesor adiantouse ao seu marcador á falta de 4 minutos para o descanso.
A terceira novidade foi Jutglà, que apenas entrou en xogo nun ataque moi desasistido no que só Aspas avisou cun par de tiros con intención, aínda que a mellor ocasión foi de Miguel Román cun tiro desde a frontal. A maiores, nas probas de Claudio, Hugo Álvarez xogou como atacante pola esquerda e Carreira foi o carrilero desa banda.
Claudio cambiou o once por completo tras o descanso e a primeira noticia da segunda unidade foi un penalti de Mingueza sobre Rochinha que Justin de Haas enviou ao fondo das mallas cun disparo cruzado a media altura ao que non chegou Iván Villar. Un dos datos máis rechamantes da segunda metade foi a presenza inicial de Beltrán como central, xogando Cervi como atacante dereito e Tincho estreándose como carrilero esquerdo.
Nesta segunda metade o Celta non mellorou a súa versión. Estivo igual de errático co balón e aínda que puxo a proba ao meta rival fíxoo con pólvora mollada. O primeiro aviso foi unha falta directa botada por Ristic, que colleu portería pero moi centrada, o que permitiu ao porteiro devolver o esférico.
Á falta de 20 minutos Claudio meteu no campo a Starfelt, pasando Beltrán á súa posición natural de pivote, e a Hugo González, que disputou como dianteiro os seus primeiros minutos co primeiro equipo. Na pausa de hidratación da segunda metade, Iván Villar, porteiro e segundo capitán, reclamou «acabar ben» o partido, un claro síntoma que desde a portería se vía o mesmo partido plomizo que na mini bancada. Na recta final, unha das contadas combinacións célticas provocou un un contra un de Swedberg co porteiro do que saíu gañador o portugués. O Celta necesita un bo puñado de pólvora.
Ficha técnica
CELTA: Radu; Javi Rodríguez, Yoel Lago, Marcos Alonso; Jones, Damián, Miguel Román, Carreira; Iago Aspas, Pablo Durán e Hugo Álvarez. Tras o descanso: Iván Villar; Beltrán; MIngueza, Sotelo, Ilaix, Tincho (Starfelt, min 70), Cervi, Durán (Hugo González, min 70) e Swedberg.
FAMALICAO: Lazar, Pinheiro, Justin de Haas, Realpe, Pedro Bondo, Van de Looi, Otar, Óscar Aranda, Sorriso, Simón Elisor e Ribeiro. Tamén xogaron: Zlobin, Cabral, Cunha, García, Ba, Mattara, Thiago, Soares, Topic, Gil Dias, Rochinha, Sá, Amorim, Limatta, Yassir, Jonas, Almeida, Abubakar e Pedro Santos.
GOLES: 0-1, min 41: Elisor. 0-2, min 47: Justin de Haas.
ÁRBITRO: Figueirido Comesaña (Colexio Galego).